Homo Erectus

Usa ka adlaw niana nangutana ang anak ngadto sa iyang amahan nga maestro: “Nganong Gitawag man kita og Homo Erectus?”

Ang Amahan mitubag: “Tungod kay gitagana kita alang sa mas dagko pang mga butang. Mao nga tanos kita og barog ug magsud-ong kita sa halayo!”

Usahay gipakagamay nato ang atong kaugalingon gumikan sa atng mga kahuyangan.

Maingon nga ang uban buot usab nga mopakagamay nato gumikan kay lagi dili kita paigo alang sa ilang sukaranan kun standard.

Kining maong kahimtang usahay makapasagmuyo sanglit mahimong sila nga wala kauyon nimo ang mahimong morecruit usab og laing mga tawo aron sila maglagot pud nimo. Ingon ini ang kinabuhi dili fair.

Apan angayan natong hinumdoman nga kitang tanan gipahimugso gyud nga dunay tumong ug dunay pulos.

Matag usa dunay padulngan ug matag usa gitagana alang sa mas dagko pa nga mga butang. Ingon ini ka bililhon ang atong kinabuhi nga dili angayan nga sayangan.

Tanos kita nga mopanaw sanglit ang Dios tanos nga mosulat sa badlis nga hiwi.