Di gyud mayo

Hangtud karon wa pa gyud mahatagi’g pagtagad ni Cebu Governor Pamela Baricuatro ang problema sa mga nagbuhi og baboy nga taga probinsiya sa Sugbo nga nag-antos sa pagpamentaha sa mga kumprador nga migamit sa kamandoan ni Pam aron barato ra ang pagpalit nila sa mga baboy.

Sa dayong paglingkod ni Governor Pam sa katungdanan, gimando niya nga mahimo na nga matumod dinhi sa Cebu ang mga baboy nga gikan sa Negros Oriental, Bohol ug ubang probinsya. Tungod niini, gisakyan kini sa mga abusadong kumprador.

Sagad sa mga kumprador dunay mga pwesto diha sa kamerkadohan, ug utangon pa gani nila ang mga kumprahon nilang mga baboy gikan sa mga nagbuhi niini. Sayonan ka nga didto sa Argao, usa ka nagbuhi’g mga baboy mitug-an nako nga ang inihaw nga baboy tag P190 ra ang palit matag kilo?

Kon “live” ang pagpalit, P140 ra ang kilo. Ang gihimong rason sa mga kumprador nga mga meat dealers sab, abunda kuno kaayo og mga baboy ang Sugbo kay gitugotan na man ni Governor Pam ang pagpasu’d dinhi og mga baboy nga gikan sa mga silingang probinsya.

Gisuwat nako kining maong problema sa mga nagbuhi og baboy mga duha ka semana na ang nakalabay, apan wa ra hatagi og pagtagad sa gobernador. Didto sa Barili, ang palit nila tag P200 ang kilo na lang karon kay ingnon ka ra man nila nga das-ag na kaayo ang mga baboy.

Para nako, ang isyu niini kay dili man makapahimu’s ang mga yanong pumapalit sa pagmenos sa prisyo sa mga baboy. Aw, testigos niini ang mga mamalitay’g karne nga sa kamerkadohan kapin gihapon sa P330 ang kilo sa mga karneng baboy.

Ang mga meat dealers ug kumprador ra maoy makaganansya, apan ang mga nmagbuhi’g baboy maalkanse tawon kay nagpabilin man nga mahal ang lawog sa ilang mga binuhi.

Unta, mahatagan na og pagtagad ni Governor Pam kining mao nga isyu, kay daghan sa mga nagbuhi’g mga baboy misuporta baya niya sa miaging eleksyon.

* * *

Nangayo man diay og P3 nga usbaw sa minimum nga plitehan ang mga tag-iya ug driver sa sa mga Public Utility Jeepney (PUJ) kay mahal na kuno kaayo ang prisyo sa fuel pagka karon.

Para nako, angay gyud nga tun-an pag-ayo sa kagamhanan, pinaagi sa Land Transportation Franchising and Regulatory Board (LTFRB) kining gipangayong usbaw sa minimum nga plitehan para sa mga PUJ.

 Tinuod, usahay mosaka ang prisyo sa fuel, apan usahay sab mokunhod man ang prisyo. Kon tugotan nga usbawan ang plitehan, magpabilin na kini bisan og mokunhod pa pagpadayon ang prisyo sa mga petroleum products.

Ang alkanse mao ang mga sumasakay.