Intact ang legasiya

Sa iyang pagbalik sa ring human sa upat ka tuig nga pagpahulay, si Manny "Pacman" Pacquiao mipakita og kaisog ug kadasig batok sa mas batan-ong kampeon nga si Mario Barrios sa Estados Unidos.

Sa edad nga 46, si Pacquiao mipatigbabaw sa daghang rounds, nagpakita sa iyang pabiling kusog ug abilidad.

Apan sa kataposan, ang duwa natapos sa majority draw, resulta nga gikasubo sa daghang Pilipino nga misaksi sa makasaysayanong away.

Sa tanang rounds, si Pacquiao nagpakita og determinasyon.

Mihugyaw ang mga fans sa iyang signature nga left straight ug footwork, sama niadtong panahon sa iyang kabatan-on.

Gani, mismo si Pacquiao midaklara nga siya ang midaog sa maon kumbati, 8-4. Ug daghang analyst ang miuyon.

Gani miuyon usab sila nga ang iyang agresyon ug ring control mas labaw kay sa gipakita ni Barrios.

Si Pacquiao mipadayag nga gusto pa siya moaway. Apan ang pangutana: Hangtod kanus-a? Sa iyang edad, hinay na ang iyang lihok sa ring nga maoy nakapataas sa peligro sa iyang kinabuhi.

Ang iyang performance karon, bisan daghan pa gihapon ang mibilib, nagpakita nga siya wala na sa iyang prime.

Intact na ang legasiya ni Pacquiao ug wala na siyay angay iprobar pa ibabaw sa ring.

Angay na hinuon nga ihatag na ni Pacquiao ang iyang trono ngadto sa batan-ong henerasyon.

Mas haom alang kaniya ang mahimong mentor, statesman, ug inspirasyon sa mga rising star sa boxing.