Pakyas ang K-to-12?

Matud pa sa economics professor sa De La Salle University nga si Maria Ella Calaor-Oplas, kinahanglan nga hatagan sa gobiyerno og hustong kahigayonan nga makasinati og tinud-anay nga pagpanarbaho ang mga K-to-12 graduates aron maandam sila sa ila unyang pagtapos sa maong programa. Gipanglantawan na daan nga mapakyas gayod ang K-to-12 program tungod kay nagkinahanglan kini og komprehensibo’ng industrial policy nga kinahanglan unta nga naplastar na daan sa wala pa kini ipatuman.  Husto ang akong amigo sa iyang panahom nga “Kon eskwela, eskwela.  Kon trabaho, trabaho pud.  Wala sa eskwelahan ang trabaho kon dili tua didto sa mga pabrika.”  Mao maan!

 Use your coconut!

Gimandoan ni Presidente Marcos ang Philippine Coconut Authority (PCA) sa pagtanom og 50 ka milyon ka punoan sa lubi sa sunod tuig aron mabuylohan ang paglambo sa industriya sa lubi ug masakmit nato pagbalik ang kanhi bansag sa nasud nga nag-unang tinubdan sa maong produkto sa tibuok kalibutan. Angayan nga hatagan og tinuoray nga pagtagad sa gobyerno ang industriya sa lubi tungod kay dako usab kini’g tampo sa atong ekonomiya.  Kon tinud-on pagpatuman sa gobiyerno ang maong programa, makaingon na gyud kita nga “Gigamit na sa mga opisyales sa gobyerno ang ilang ‘coconut’.”  Muleeng!  

 Imo’ng tigmo, imo’ng sulbad

Andam si PNP Chief Gen. Nicolas Torre III nga mangulo sa operasyon pagpangita sa mga patay’ng lawas sa 34 ka sabungero nga gituohan’g gilubong sa Taal Lake sa Batangas, base sa impormasyon nga gibutyag sa usa ka suspetsado bugti sa iyang hangyo nga himoon siyang state witness.  Mahinumduman nga giimbestigahan kining maong kaso ni Gen. Torre sa dihang siya pa ang hepe sa CIDG.  Kining pagboluntaryo ni Gen. Torre pagpangita sa mga nahanaw nga mga sabungero makapahinumdum sa linya sa kanta ni Yoyoy Villame nga nagkanayon, “Kon ugaling duna kay tigmo nga lisod nga sabton, ikaw man ang nagtigmo, imo sa’ng badbaron.”  Fezteleern!

 Sistema batok kinaiya

Mipadayag si Presidente Marcos sa iyang suporta kabahin sa “No Contact Apprehension Policy” (NCAP) nga gipatuman sa Metro Manila Development Authority alang niadtong mga motorista nga nakalapas sa balaod sa trapiko kay nakatabang kuno ang maong polisiya sa pagpakunhod sa kurapsyon.  Mora’g sa theory ra man makunhoran ang kurapsyon sa pagpatuman sa NCAP. Matud pa bitaw, “Walay pulos ang sistema kon kurap gayod ang kinaiya.  Gani, bisan nagbaga pa ang puthaw, sa mga kurap ug kawatan, sayon ra kaayo kini’ng mahanaw.”  Madahaan!

Classes…never mind!

Mipasalig si DepEd-7 Director Salustiano Jimenez nga dawaton pa sa kadtong mga estudyante nga maawahi sa pagpa-enroll sa school year 2025-2026, basta dili pa molapas ang usa ka buwan gikan sa gitakda nga adlaw sa pagsugod sa enrollment.  Makapahinumdum kining gisagop nga polisiya sa DepEd sa pagya-komedya sa mga estudyante sa usa ka dakong unibersidad dinhi sa dakbayan diin late usab nga magpa-enroll ang mga estudyante kay lage matud pa nila, “Sa among eskwelahan, ‘Enrollment is still going on.  Classes…never mind’.”  Pagkatoytoy!