Ang atabay

Basaha: Col. 4;2

Nahinumdom ko nga didto sa Bawo, Sogod, nagpuyo mi sa usa ka balay nga dunay atabay. Hinuon sa unahan dunay poso artesyano.

Walay gripo ug kasagaran sa mga tawo adto gyud didto magsag-ob. Hinuon dunay atabay sa kilid sa balay nga among gipuy-an.

May giladmon kini ug panington pud ka diha sa pagbira bira sa pisi hangtud nga ang sulod sa timba imong ihuwad sa balde nga imo na pud dad-on diin ka maglaba o maghugas ba kaha.

Kapoy ang maong proseso apan sa laing bahin dako og ikatabang aron mas matugkad mo ang dakong bili sa birtud sa pagpailob.

Sama usab sa atong kinabuhi sa pag-ampo. Ang mga beginners matud pa maglisud gayud. Bisan naman gani kadtong nagpuyo sap ag-ampo ang tingali makasinati og kalisdanan. Ngano man? Tungod kay diha sa pag-ampo mahinungdanon kaayo ang pagpatidlum. Dili lang paigo ang vocal prayers nga atong nakat-onan segun sa mandato atong tinuohan.

Diha sa mga mata ni Santa Teresa de Avila ang pag-ampo kahigayonan sa pagpakighigala ngadto sa Dios. The more kita nga mag-ampo the more nato nga mailhan ug masinati ang Dios ug si kinsa siya sa atong kinabuhi. Kun magkalawom ang atong kinabuhi sa pag-ampo mas magkaduol kita sa tubod sa tubig sa kinabuhing dayon nga walay lain kondili ang atong Ginoong Jesukristo. Ang tuburan mao man kadtong maghatag kanato og kabaskog sa atong kalagnong pagkinabuhi.

Ang nagkalawom nga pag-ampo magdala kanato ngadto sa tinud-anay nga kahilom ug kalinaw.

Ug kun anaa kita sa kahilom wala kitay laing masud-ong gawas lamang sa tinud-anay nga tuburan nga walay lain mao ang Dios. Dios Solo Basta! Ang Dios lamang paigo na! Matud pang Santa Teresa de Avila.