Ang tanaman

Basaha: Mt. 13;24-30

Ang tanaman mahinungdanong kabahin diha sa kinabuhi sa matag tawo o banay.

Kini tungod kay ang maong tanaman mahimong suroyanan aron mahanaw ang kalaay apan nunot usab niini ang kahigayonan diin ang nisuroy nga mao ang tag-iya makapamupo sa mga bunga sa iyang mga tinanom aron gamiton ingon nga pagkaon o dili ba kaha tambala lang sa mga sakit.

Apan aron makab-ot ang gitinguhang mga maayong bunga kinahanglan nga ang maong tanaman atinamon pinaagi sa paghinlo niini gikan sa mga sagbot ingon man sa pagpul-ong sa mga sanga aron mamahimong tul-id ang pagtubo niini.

Uban pud niini ang makanunayong pag-atiman, pagbubo og tubig ingon man pag-abuno niini. Dili dayon kini motubo busa nagkinahanglan usab kini og pailob ingon man paglahutay.

Ingon ini usab ang atong kinabuhi diha sa panaw nga espirituhanon ug tawhanon. Kita ang nahisama sa mga tanom nga anaa sa tanaman nga gipanag-iya sa Ginoo.

Ang iyang grasya maoy nag-atiman kanato. Mahimong putlon niya ang bisan unsang babag sa atong pagtubo lakip na niini ang mga sala nga nakapahilayo kanato gikan sa grasya sa Dios. Putlon kini gikan sa atong kinabuhi.

Ang Pulong sa Dios mao kadtong mamahimong abuno inubanan sa mga sakramento. Naghatag kini og kabaskog dili lang sa atong kalag kondili usab sa atong lawas.

Ang proseso sa paglambo nagkinahanglan man og panahon ug dili kini masukod sa tawhanong panahon kondili sa panahon nga gimbut-an sa Diosnong pagbuot.

Ug kun sa panahon nga gimbut-an mobunga kita diha sa atong mga maayong buhat, dakong kalipay sa Dios nga magpabilin aron sud-ongon ug tagamtamon ang kaambong sa iyang binuhatan.

Kita usab ang mabulahan kay gikan sa Diosnong pag-amoma kita mamahimong himsog, mapuslanon diha sa parasan sa Ginoo.

Sama sa tanom mahimo kitang molabong ug modaghan ang atong mga dahoon, apan mag-unsa man kini kun sa Ginoo kita halayo?