Micro chipping sa mga iro ug iring mandatory na

Sugod sa buwan sa Hulyo, mandatory ang pagbutang og microchip sa mga iring ug iro dungan sa pagparehistro ug ang makalapas dunay silot ang mga pet owners. Ang micro chipping sa mga binuhing hayop makahatag og kasayon sa pag-ila kon si kinsa kadtong mga tag-iya nga walay pulos nga manghinaw sa ilang responsibilidad kong makasala o makapaak ang mga iro ug iring kay maglikay sa ilang tulobagon.

Sulod sa microchip ang tanang data sa pets ug data sa mga amo apil ang address ug phone numbers ug naa say map locator aron segurado nga matultolan kong asa ang balay sa mga namuhi ining mga hayopa. Inisyatiba kini ni Dr. Alice Utlang, ang Cebu City veterinarian aron madisplina ang mga pet owners. Daghan ang ganahan mamuhi og iro pero kutob lang sa gana kay pasagdan ra man nga makabuhi ug maglaroylaroy sa karsada nga makapaak na sa mga tawo hinungdan nga taas usab ang kaso sa dog bite sa dakbayan tungod sa pagpasagad sa mga tag-iya.

Ang pag-alima og mga hayop dili lang ganagana kon dili dako kini nga commitment dili lang sa mga pets nga atimanon apan apil na sa komunidad aron dili kini makasala. Gawas pa, kong naay microchip, kong dunay magpasipala sa mga iro, ma-trace dayon ang tag-iya ug mapahibawo ug maatiman kini. Daghan nga iro ug irong nga mangaligsan sa karsada ug pasagdan nalang. Ang dakbayan sa Sugbo ang una sa Central Visayas nga mopatuman og mandatory micro chipping. Hiinuon existing kining programaha karon pero voluntary, dunay minimal fee pero mas maayo o bentaha na kaayo. Dunay uban nga dili makauyon nga butangan microchip ang mga pets kay sakit daw. Apan mas dako og kaayohan ang mahatag niini kay matutokan ang ilang kahimtang ugaling dunay masugatan nga mga panghitabo nga naglambigit nila.

Maayo unta kong ang ubang LGU ang mopatuman pud niining programaha. Kon nahimo man sa Cebu City walay rason nga dili usab kini mapatuman sa ubang mga syudad ug lungsod.  Magahinan man seguro kini og budget kong gustohon lang.

Laing programa sa DVMF ang pag-limit ngadto sa napulo lang ka pets sa matag tag-iya kay kong molapas kinahanglan na nga mokuha og business permit ug mobayad og mahal. Daghan matud pa nga nagbuhi og daghan iring ug iro nga walay permit diin gigamit ang self-advocacy isip mga pet lovers. Pero kinahanglan nga motuman sa lagda sa pagpahumi og hayop. Gani naay gigamit nga front lang ang pagbuhi og mga mananap pero gihimong pangwartahan kay mag solicit og pundo kunohay isuporta sa mga pets.

Kudos ni Dr. Alice Utlang nga magbilin og programa nga sama niini sa dili pa siya moretiro sa katungdanan isip pangulo sa DVMF karong tuiga. Utlang legacy!