PRRD dili mapilde

Kataw-anan! Ang administrasiyong Marcos nga gipangulohan og huyang kaayong lider, nagtuo nga ang ilang pagkidnap-surender ni kanhi Presidente Rodrigo Roa Duterte (PRRD) ngadto sa mga maapil-apilon ug banyagang kamot sa International Criminal Court (ICC), The Hague, Netherlands, hingpit makapalukapa sa pamilyang Duterte ug dili na makabangon sa arena sa politika, apan sila (Marcos-Araneta-Romualdez forces) hinuoy naunay pagka-shot sa gahong.

Binilyon ka pesos ang gigahin ni Presidente Bongbong Marcos Jr. (PBBM) ngadto sa iyang mga piniyalan aron maoy gastoon sa ilang pagpangampanya ug pagseguro sa ilang sayon nga kadaogan.

Halos tanang dagkong political rally anaa si PBBM, nag-endorso sa iyang 12 ka senatorial bets. Pero, unsay resulta?

Diyotay ray milampos sa iyang 12 ka manok. Mas daghan ang oposisiyon. Diin, DDS supporters nahibulong-nadismaya nganong 3 ra ka PRRD’s senatoriables ang nakalusot nga straight Duterte ten man ilang gibotaran?

Gani, tanang Duterte nga mikandidato ug tanang PRRD’s senatorial bets sa 2025 midterm election, midaog via landslide sa Davao City. Usab, sa tibuok Mindanao ug Visayas. Si Tatay Digong, bisag gitan-ogan nila sulod sa ICC, mihakot gihapon ug kadaogang makabungog.

Mga Overseas Filipino Worker (OFW) sa nagkalainlaing dapit sa kalibotan, tanan solido pong mibotar-mipadaog sa Duterte ten senatoriables. Ug nganong pag-abot sa Comelec tulo ray nakalusot? Hain man diay ang uban?

Niining pagdaog ni PRRD, naghatag kinig bug-at mensahe ngadto sa ICC ug sa tibuok kalibotan unsa ka bililhon ang kanhi presidente sa Pilipinas sa mga mata sa katawhan?

Ang pagtapok kanunay sa mga OFW haduol sa atubangan sa ICC kada adlaw agig pakita unsa siya nila kamahal, igo na kaayong makamatuod nga kining pagka-illegally detained ni PRRD, bunga lamang sa mga tumotumong scripted nga pasangil tungod sa away sa politika. Busa, politically motivated!

Ingkasog maoy paboran sa ICC ang hugawng habig nga hagbay rang gisuka sa mga Pinoy ug ilang madesisyonan nga bilanggoon gyod si PRRD, seguradong mahimo pong hugaw ang ICC tipon niining maong hugaw.

Ug may morespeto pa kaha nilang kanasoran? Ang milyonmilyong Pinoy nga nagpangga ni PRRD, dili kaha matriple ang kaisog sa pagpangitag paagi hangtod ma-impeach si PBBM?

Sa natad sa politika, pagpamunoan, pagdisiplina, pagnaghiusa ug kaangayan, kanus-a ba napilde si PRRD?