Mamahimo bang papahawaon ang saup?

Dear Atty Divina,

Maayong adlaw. Naa koy nasunod nga yuta sa akong ginikanan nga nakapangalan na naku ang titulo. Sa buhi pa sila naay iyang pag-umangkon nga gipatabang niya og kopras sa lubi, pagahatagan og ikatulo sa halin. Hangtod karon, mao lang gihapon akong gisunod. Akong pangutana atty, nagplano ko nga akong bahinon ning yuta sa akong mga anak. Naa ba akoy obligasyon kaniya sa ngan nga siya ang gabantay sa yuta? Dia diay ako sa layo atty. mangayo ako tambag atty. Daghang Salamat

Glenn

* * *

Dear Glenn,

Kun dugay na ninyong gipabantay ang pag-umangkon sa imong ginikanan sa inyong yuta ug inyong gibahinan og katulo nga bahin sa kita niini, makonsiderar nga usa na siya ka saup. Basi sa balaod ang usa ka saup dili basta-basta nga mapapahawa bisan pa kun ibaligya na ang yuta or lain na ang tag-iya niini, magpabilin gihapon siyang saup. Kun gusto na nimong kuhaon ang property kay imo na kining bahinon ngadto sa imong mga anak then aduna gyud ikaw obligasyon kaniya isip saup. Mamahimo nimo siyang bayran depende kun pila ang inyong masabutan bugti sa imong pagkuha sa property. Mas maayo sab nga mokonsulta ka sa Department of Agrarian Reform kon DAR aron ka magiyahan kun unsay angayan nimo nga buhaton. Lain nimong option, mao nga magpabilin gihapon siyang saup bisan kun ang imong mga anak na ang tag-iya sa maong yuta. Thank you and God bless! -- Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.