EDITORYAL — Ekonomiya maoy unahon

Lahi ra gyud ang paminaw kun ang mga lider nga nagdala sa usa ka lugar kun ang hunahuna mao ang unahon ang interes sa katawhan ug sa ilang lugar alang sa kalamboan kun itandi anang ang mga lider nga ang naa sa hunahuna mao ang kasamok, pagdumot, ug panimawos ngadto sa mga karibal sa politika.

Sa nanglabay nga siyam ka tuig walay laing nabuhat ang mga politikong naglingkod sa tagsa-tagsa nila ka mga pwesto kondili ang pagsige og gukod sa ilang mga kontra diha sa oposisyon.

Wala ug tuo ang mga kontrobersiya, anomalya, mga akusasyon ug daghan pang personal nilang interes maoy gilawgan samtang nagtagbaw sila sa paggamit sa ilang gahum, impluwensiya, kwarta sa katawhan para sa ilang kaugalingong katagbawan.

Nahitabo kining tanan atubangan mismo sa katawhang maoy nagbutang kanila sa pwesto aron mamumuno. Katawhang ilaha lang gisulsolan, gigawngan ug gilawgan og mga ayuda, mga dili malungtarong programa, ug mga propagandang makabuhi og patay.

Sa laktod, sa nanglabay nga siyam ka tuig, inantigo kaayong gilawgan ug giduwa-duwaan sa mga naglingkod sa pwesto ang sitwasyon sa katawhang Pilipino ilabi na kadtong mga kabus pinaagi sa pagulog-ulog kanila ug pagsaad-saad.

Sa miaging piniliay, naklaro na gyud nga mayoriya sa mga Pilipino sa tibuok nasud ang di na gustong pamunoan og palaaway o potensiyal nga tawo-tawo sa humayan o gamitong tigtisok og kasamok nga makapabahin-bahin sa tanan.

Samtang sagol-sagol ang resulta, apan nakita nga ang gusto  karon sa mga Pilipino  mao ang kahusay, kalamboan para sa tanan ug dili para lang sa usa ka tawo o pamilya.

Kinahanglang atimanon dayun ang ekonomiya, pagawhag og mga investors, palambuon ang social services, panglawas, edukasyon, seguridad sa tanan ug seguridad sa pagkaon sa unang adlaw sa ilang panerbisyo karong Hulyo 1.

Ang nasud nga malambuon, puy-anan og malambuong katawhan.