Kahawan sa lawak

Dunay usa ka turista nisuroy sa halayong dapit sa probinsiya. Sa maong dapit iyang gikahibalag ang usa ka ermitanyo. Gidapit siya niini nga moinom og kape sa pinuy-anan niini. Pag-adto niiya iyang Nakita ang kahawan sa pinuy-anan niini.

Gipangutana niya ang ermitanyo kun nganong hawan man ang panimalay niini ug dili sama sa iyang gipuy-an nga puno kaayo sa mga kabtangan. Nisumbalik og pangutana ang ermitanyo kun nganong wala man niya kini dad-a sa iyang pagbisita sa maong dapit.

Ang turista nagkanayon: “Tungod kay turista ug bakasyonista lamang kin isa maong dapit. Ang ermitanyo nagkanayon: “Managsama lamang kita, bakasyonista usab ako ning kalibutana.”

Sa atong panaw sa kinabuhi usahay nahimo kitang nagbagood sa atong mga gipas-an. Usahay ang gipas-an nato wala unta gikinahanglana. Apan lagi ang atong pagsabot sa kadato mao  man ang paghupot og daghan.

Apan ang tinuod nga kadato mao man ang walay gihuptan nga sa ato pa, wala nato tugoti ang bahandi nga nahimong babag sa atong inadlaw nga panaw sa kinabuhi ug sa panaw padulong sa laingit.

Dili dautan ang paghupot og bahandi apan ang pangutana mao: “Unsa may atong pagsabot sa bahandi? Basin baya og giulipon na kita niini.