EDITORYAL – Mangakulban og kaldero

Kung ang mga naparot nga kandidato gibati og kahingawa ug katanghaga nganong napildi sila, dunay mas grabeng gipangulbaan karon nga lain na ang nagdala sa renda.

Sila kining kaliboang mga job order ug casual employees apil na ang mga co-terminus employees sa nagkadaiyang mga local government units.

Human nangapildi ang ilang mga mayor, sigurado sab nga makulban sila og kaldero ini og pormal na og lingkod sa bag-ong liderato.

Sigurado man gyud nga ang bag-ong pamunoan magdala man pud og ilang mga tawo nga maoy ilang kuhaon aron moserbisyo. Natural lang kini matag mausab ang pamunoan.

Kay kining mga mayor duna man gyuy mga tawong sinaligan nga ilang masampit panahon nga ilaha silang kinahanglan.

Karon nga lahi na sab ang mga mayor, mailisan gyud kining daghang mga casuals ug JO, maayo lang unta og ang ilang mga trabaho o posisyon essential o kinahanglan gyud kaayo, unya sila ra ang dunay skills aning trabahoa kay dili gyud sila basta mahulipan og lain.

Apan mas labing maayo unta kun ang mopuli nga mga bag-ong mayor dili motan-aw sa political affiliation aning maong mga maapektahang empleyado kondili ang ilaha gyung abilidad sa trabaho.

Hinuon dili sab gyud ikalimod nga dunay mga JOs o casual employees nga redundant o kaparehas ra og trabaho sa mga regular apan kay lagi kaila o higala sa higala sa mayor maong gi-hire sila bisan og wala silay gamit.

Unta lilion kini og maayo sa bag-ong pamunoan, tangtangon ang angay tangtangon ug ipabilin kadtong angayan ug gikinahanglan.