Mora og napilde si Garcia
Mahimong kuwestiyunon ni outgoing Cebu Gov. Gwen Garcia ang iyang pagkapilde sa eleksiyon niadtong Mayo 12. Nangangkon ang iyang mga dumadapig nga naghipos na sila karon og mga ebidensiya sa giingong pagpanikas nga nipabor ni governor-elect Pam Baricuatro.
Posibleng mao diay ni rason nganong hangtod karon wala pa moklaro og angkon og kapildehan si Garcia. Atol sa labing una niyang pagpakita sa publiko niadtong Biyernes, igo lang niingon nga mora siya og napilde. Mas gihatagan og importansiya ang pagpamuyboy sa mga nibiya ug sa pagpasalamat sa mga nagpabilin uban niya.
* * *
Ambot nganong nagduda pa sa iyang kapildehan, si Garcia angay'ng pahinumdoman:
• Sa opisyal nga ihap sa Commission on Elections (Comelec), si Baricuatro dunay 1,107,924 ka boto samtang si Gwen dunay 765,051, sa ato pa, walay lalis nga 342,873 ka boto ang iyang lubong; ug
• Niila na sa kadaugan ni Baricuatro ang iyang mga manghod nga silang kanhi Provincial Board Member Winston Garcia ug Kongresista Pablo John Garcia, iyang anak nga si Tourism Secretary Christina Frasco ug iyang running mate nga si Vice Governor-elect Glenn Soco.
* * *
Sa walay paghatag og dugang detalye, gibisto sa mga dumadapig ni Garcia ang mga sukaranan sa ilang pagduda sa maniobra sa eleksiyon:
• Una, may mga presinto nga mas daghan ang naihap nga mga boto kay sa gidaghanon rehistradong mga botante ug sa aktuwal nga nibotar; ug
• Ikaduha, mahimong gigamitan og algorithm ang tanang automated counting machines sa probinsiya nga nibaylo sa mga boto ni Garcia ngadto ni Baricuatro ug sa mga boto ni Baricuatro ngadto ni Garcia.
* * *
Kuwang na lang og diyutay nga ideklarar sa mga dumadapig ni Garcia si Soco usa lang ka pahoy ug busa walay katungod nga makaangkon og mas daghang boto kay sa nipadagan niya. Nga susama ang mga boto nilang Soco ug Baricuatro nakapasamot sa ilang pagduda nga ang mga boto ni Baricuatro maoy tinuod nga mga boto ni Garcia.
Nipasangil sila nga si Garcia ang tinuod nga target sa maniobra. Nga para nila wala pasiugdahi sa mga Duterte. Kon dili sa mga puwersa nga mas gamhanan pa. Sayon rang pag-istorya. Atong tan-awon duna ba silay ebidensiya.
* * *
- Latest
