Pagkamanggihatagon

Usa ka Dominggo niana nahimong busy kaayo ang opisina tungod kay daghang mga tawo. Dunay magtiayon nga niduol ug nihatag og donasyon alang sa kagamitan sa Parokya.

Human sila makadawat sa resibo niingon sila nga kun mahimo dili gyud kini isaba.

Sa ato pa, dili sila ganahan nga mabandilyo ang ilang kamanggihatagon.

Nakaingon ko nga kun duna pa lay mga tawo nga sama nila ug kinaiya pagkaanindot sa kalibutan nga bisan diha sa kahilom padayon gihapon sa pagkamanggihatagon.

Ang pagkamanggihatagon dili lang mahimo natong sabton ingon nga pagpaambit sa mga material nga panalangin ngadto sa uban.

Hinunoa, ang pagkamanggihatagon alang nako nagasukad man sa pag-angkon sa kaugalingong kakabus.

Nga diha sa kakabus nakadawat kita og panalangin gikan sa Dios kun abli lamang kita alang niini.

 Ang pagdawat sa panalangin maoy nagdapit kanato sa pagpaambit niini.

Kining maong pagpaambit gumikan sa pagkaalinggat nga wala kitay bisan diyotay ng atua sa atong kinabuhi. Ang tanan nga atong nahuptan mahimo man natong mabiyaan.

Ang maong sanglitanan nakahatag kanako og kadasig. Nga bisan pa man kun ang katilingban ug isi'g ka ingon usahay dili makiangayon ug hakog ug walay pagpakabana, padayon gihapon sa kaayo.

Kaayo nga dili mapasagaron. Kaayo nga dunay disiplina ug pagpanton.