Mga magbalantay sumala sa akong kasingkasing

PAGPAMALANDONG SA MALANGKUBONG KAAYOHAN

Mayo  11, 2025: Ikaupat nga

Domingo sa Pasko sa Pagkabanhaw

(Domingo sa Maayong Magbalantay)

Mga Pagbasa:  Buh. 13;14,43-52/

Sal. 100/Gip. 7;9,14b-17/Jn. 10;27-30

Maayong Balita

Ang mga magbalanay sa mga Karnero niadtong unang panahon adunay linain nga taras ug kinaiya. Sila nakaila sa ilang mga karnero ug ang mga karnero nakaila kanila. Kun dunay mga karnero nga mahisalaag ila gyud kining pangitaon ug human kini nila makita, ila kining pas-anon sa ilang abaga ug saulogon nila ang pagkakaplag niini. Sa atong pagkahisalaag padayon kitang pangitaon ni Kristo atong Magbalantay pinaagi mga Magbalantay nga iyang gisangonan aron pag-atiman sa iyang panon dinhi sa kalibutan nga mao ang iyang mga kaparian ug mga pinili.

Kasinatian

Adunay krisis sa bokasyon karong mga panahona. Nagkinahanglan kita og daghang mga pari ug mga relihiyoso nga subay sa kasingkasing sa Ginoo. Mga balaang kaparian nga kinahanglanon kaayo aron mapadayon ang pangalagad alang sa kaluwasan sa mga kalag.

Lihok

Pag-ampo aron molahutay ang mga kaparian sa ilang misyon. Tabangi ang mga seminarista ug mga madre kutob sa mahimo lamang.

Ug labaw sa tanan, himoa ang imong pamilya ingon  nga unang luyonganan sa bokasyon. Himoa ang panimalay nga unang seminaryo alang sa simbahan.

Pangamuyo

Pangulo: Ginoo Magpadala ka Unta

Tanan: Ug mga Balaang Apostoles sa Imong Simbahan