Babaye suga sa pinuy-anan

Hisgotan nato ang kahimtang sa panglawas sa kababayen-an ilabi na sa mga balatian nga nahigauman nga daw pirme lang mataligam-an kay lagi kanunay busy sa pag-atiman sa pamilya bahalq na og dili niya maatiman ang iyang kaugalingon.

Niining buwan sa Mayo gibansagan kini nga Scarlet May diin gipahinungod alang sa  kababayen-an nga nataptapan o posibleng mataptan sa cervical cancer. Atol sa gipatawag nga presscon sa Department of Health ug sa Vicente Sotto Memorial Medical Center niadtong nakalabay'ng semana, diin gibuksan ang Cervical Awareness Month, gibutyag sa mga health experts nga usa sa killer diseases ang cervical cancer.

Kini tungod kay ulahi na dihang moduol ang mga babaye sa mga eksperto sa panglawas kalabot sa gihambin ngq balatian maong dili na maluwas kay anaa naman sa last stage ang cancer. Giklaro sa mga doktor nga preventable ug treatable ang maong balatian kong masayo lang sa pagsuta.

Hangtud karon mauwaw pa gihapon ang mga babaye sa pagpaubos sa ilang kaugalingon sa mga regular checkup kay dili gusto nga makita o mahilabtan ang ilang kinatawo. Mapugos na og pahiling kong dili na kaagwanta sa sakit apan ulahi na ang tanan.

Ang VSMMC adunay katakos sa pagsuta ug pagtambal sa mga babaye nga adunay ingon niini nga sitwasyon ug naa usay pundo ang kagamhanan sa mga pasyente busa wala gyuy untat problema kong huna hunaon ang bayad.

Kinsa man ang mamahimong mataptan niini? Kadtong mga babaye nga sexually active, kadtong mga multiple partners ug uban pa, gani bisan kadtong mga stick to one woman mahimong mataptan tungod sa mga hinungdan nga wala na siyay kontrol. Sa Mayo 18 ipahigayon ang Lantern Walk isip simbolo sa mga babaye nga nagsilbeng ilaw ng tanan o suga sa panimalay.

Bisan unsa ka grabe ang balatian nagsugod kini sa daw wala lang ug napasagdan hinungdan nga nigrabe. Naa man g'yuy paglaum nga mamaayo angayan nga pahimuslan kini nga kahigayonan alang sa kaluwasan sa mga babaye nga maoy iwag sa atong pinuy-anan.

Haum lang nga suportahan natong tanan ang pagpalangyab sa kasayoran aron masabtan sa tanan nga dili angayan ikauwaw ang pagseguro nga luwas ang panglawas sa kababayen-an.