Itim campaign ad nakasamad

Human gun-oba ni Presidente Bongbong Marcos Jr. (PBBM) ang BBM-SARA Uniteam nga giumol nilang duha, diin si Senador Imee Marcos adunay dakong kontribusiyon sa pagkatukod niini, human sa pagkaguba sa ilang politikanhong relasyon tungod sa iyang pagkabakakon, pagkatraydor ug pagka-walay utang kabubut-on nga maoy hinungdan nganong hingpit mibulag si Vice-Presidente Sara ‘Inday’ Z. Duterte sa pagkamiyembro niya, isip Department of Education Secretary sa walay ayong gabinete sa pangulo, karon-niining bag-o, mipondar na usab og laing pagkahiusa sa politika sila Inday ug Imee nga gibunyagan nilag ‘Itim campaign ad.’

Diin, ang sulod sa naasoy’ng Itim campaign ad, mao ang mga paglarawan sa tanang kapalpakang gibuhat sa administrasiyong Marcos: ang pagkamatay sa hustisya, national security, freedom of press, of speech and of expression, tawhanong katungod ug uban pa. Nga maoy nakapabangutan sa Pilipinas.

Busa, nagkinahanglan atong nasud og mga matinud-anong lider, kinsa kaantigong mohugas bisan sa mga tiil sa atong poorest of the poor nga kaigsuonan ug dili mahadlok magpakamatay tungod ug alang sa iyang katawhan ug yutang natawhan. 

Mao nga dihang giindorso ni Inday si Imee ubos sa ilang Itim campaign, daghan ang gisakitan sa masig ka panig: Team-Duterte ug Team-Marcos. Sa Team-Duterte daghang diehard Duterte supporters (DDS) ang nakurat.

Kay nakasulti na baya si Inday nga ‘Never to Marcoses!’ Unya, ngano man kini karon? Magpailad na sab siya sa manggagamit nga Imee?

Samtang sa Team-Marcos, kinsa gusto g’yong ma-impeach si Inday, sila gisakitan usab sa gihimo ni Imee. Kay inay magpabilin kini sa ilang partidong kalunoron na, milayat-balhin hinuon sa mga kamot ni Inday. Ang pait, kay hasta si Camille Villar nagpaindorso sab.

Alang nako, usa ka wise move ning gihimo ni Inday. Iyang nabungkag ug napahinay ang Team-Marcos. Ug kon wala lamay kontrobersiyang mahitabo, posibleng modaog gayod ang Team-Duterte ten senatorial candidates. Pun-an pag duha: Imee ug Camille, aw, ma-12 na! Malibre-mapugngan nang impeachment ni Inday.

Unya simbakog matinuod nga segurado na si PBBM nga modaog iyang 12 ka manok, apil gihapon si Imee ug Camille. Busa, no loss si Inday. Adunay gihapon siyay masangpit.

Ang pangutana, segurado bang dili mausab si Imee ug Camille, ingkasog kini maoy mahitabo? Ato ning bantayan!