Papa sa Katawhan

Nagbangutan ang katawhan sa pagtaliwan sa dili kasarangan nga lider sa Simbahan nga Katoliko kinsa gihulagway nga People's Pope o Papa sa Katawhan. Nakugang gihapon ang mga tawo sa iyang pagbiya sa hingpit sanglit nagpakita pa man kini atol sa Pasko sa Pagkabanhaw bisan pa man og luya na ang iyang lawas. Gihuman gyud ni Pope Francis ang pagsaulog sa Semana Santa ayha kini mikuyog sa atong Manunubos nga si Hesus.

Dako kaayo ang gibating kahaw-ang karon sa mga tawo ilabi na sa mga Katoliko ug bisan kadtong dili Katoliko nga natandog sa kaaghop o passion nga gipakita ug gipabati ni Pope Francis kanila tungod kay patas ang tanan nga pagtagad niini sa mga tawo bisan unsa nga sektor. Gani mas gihatagan niya og pagtagad kadtong hut-ong sa katilingban nga giyam-iyaran sa kinabag-an.

Siya lang ang nakahimo sa paghalok sa mga tiil sa mga makasasala nga nasentensiyahan sa bilanggoan. Gihangop usab niya ang mga nahisakop sa LGBTQIA community nga walay paghukom. Ingon niana ka kaaghop ang kasingkasing sa amahan sa Simbahang Katoliko, gawas pa mihimo usab siya og dakong kausaban sa systema mismo sa simbahan, wala niya taboni ang mga eskandalo nga gilambigitan mismo sa kaparian.

Mibarug siya sa katungod sa mga linupigan, mitingog sa mga isyu nga naglambigit sa mga tawong walay tingog ug mga dinaugdaug, walay pagpanuko sa pagpanginlabot sa pangkalibutanhong isyu sama sa gubat nga gilusad sa Russia batok sa Ukraine diin ang gitan-aw niini ang kaluwasan sa mga tawo.

Bisan sa katapusang yugto sa iyang kinabuhi, gipakita niya ang iyang pagkamapaubsanon diin iyang gipanugon nga himoong simple ang pagpahigayon sa iyang kapahuwayang dayon nga igo lang suwatan sa iyang ngalan ang iyang lugnganan.

Talagsaon kaayo ang gawi nga gipakita sa Santo Papa nga angayang himoong sumbanan natong tanan. Kong nahimo niya kini walay rason nga dili kini mahimo ilabi na sa mga pari nga padayon gihapong nagbaton og bati nga batasan nga nagtoo nga sila gihapon ang limpyo ug gamhanan.

Mitaliwan man si Papa Fransisko apan magpabilin siya sa atong panumduman ug labaw sa tanan sa atong dughan ang iyang legasiya dinhi sa kalibutan. Unta sa mosunod nga lider sa Simbahan mas malabawan pa ang nahimo sa gitawag nato nga lolo Kiko. Kining tanan mag agad ra gyud sa Kabubot-on sa Dios Amahan.

Kanimo Papa Francisco, Daghan salamat sa imong kaaghop. Idol ka namo ug mismo sa akong pamilya. Tungod nimo ang gingalan nako sa akong anak lalaki gikuha sa imong ngalan Francis ug gikumbaya nako sa laing idol sa katawhan nga si St, John Paul II. Naa ka sa langit kanunay mo kaming iampo.