Online voting makapaigking

Sa usa ka ambush interview, gipangutana si Atty. Glenn Chong sa DDS vlogger kon luwas ba sa gikahadlokang pagpanikas sa Commission on Elections (Comelec) ang umaabot May 12, 2025 midterm election? Siya maisogon-pintok mitubag: “Walang ligtas ang eleksiyon sa panahon ni Comelec Commissioner George Garcia!”

Si Atty. Chong usa ka abogado nga hagbay rang sige’g bandilyo sa social media nga si Presidente Bongbong Marcos Jr. ug First Lady Liza Araneta, nanikas sa miaging 2022 election, diin nakig-tandem si Bongbong kang Inday Sara Duterte.

Matud niya, si Inday ray limpiyong midaog samtang si Bongbong may sambog-tikas kuno. Diin, aduna siyay mga lehitimong dokumento nga momatuod niini.

Apan makalibog? Kay sa kagamhanan sa Unang Pamilya, wala gyod siya ikiha!  Hinungdan, nagakadaghang Pinoy ang nakombinse sa gipanulti ni ni Atty. Chong.

Samot, nga sa online voting alang sa kaigsuonan tang Overseas Filipino Workers (OFW), ubay-ubay mireklamo nga dili ang Straight Team-Duterte candidates nga ilang gibotaran, ang mogawas ini’g pindot nila sa QR code.  Kondili, mga karakter-letra-numero ra nga dili masabot-lisod basahon. Unya may mga ngalan usab sa Team-Marcos candidates ang nahiapil! 

Hinuon, sa usa ka press conference, miesplikar si Commissioner Garcia nga ang nakita sa mga OFW pagpindot nila sa QR code, encryption box kuno kadto or sama sa safety box aron dili makita  ilang gibotaran.

Gituyo kini sa Comelec aron malikayan ang vote buying. Pero, dili angay mabalaka kay kon kinsa kunoy gipamotaran sa mga botante, magpabiling anaa ra gihapon kining tanan inig abli sa gibutangan niini. Apan inig ka human ra sa iniphanay.

Pastilan, imbes transparency (katin-awan) ang buhaton ni George, gitabonan man gihapon niyag laing takip ang butang nga maoy gustong masayran sa katawhan. Ora-mismong resibo, George, ang gustong mahuptan sa mga botante. Ug dili ang mga buktot mong palusot!

Ug bahin sa giingong encryption? Usa ka abogado mi-fact check niini ngadto sa iyang mga higalang IT expert, diin nasayran nga ang tinuorayng encryption, pulos karakter-letra-numero nga dili masabtan ra ang makita. Apan kon may pangalan o apelyido nga naporma, dili na kuno kini genuine. Kuwestiyonable ug delikadog may dautang giplano.

Ingon niini kainit ang kontrobersiyang mialisngaw sa online voting. Makapaigking! Unta, mapugngan dayon!