LTO operations

Daghan ang naluoy niadtong tawo sa Bohol nga naimbargohan og kutsilyo sa mga sakop sa Land Transportation Office (LTO) sa miaging semana kay kuno gidagmalan sa mga nagdakop kaniya.

Ang unang migawas nga video footage sa maong hitabo, dili kompleto ug nagpakita nga abusado ang mga LTO agents. Apan dihang dunay kompleto na nga video sa maong hitabo, nagpakita nga ang tawo maoy mihimo ug lihok nga nakamugna sa kagubot.

Ingon niini ang sitwasyon. Ang mga LTO agents didto ra sila sa atbang nga bahin sa karsada, samtang ang motorcycle driver, wa gyud siya gipara sa mga LTO agents.

Ang motorcycle driver mihunong ug nagsige’g lantaw sa mga LTO agents nga didto sa pikas bahin sa karsada. Kay wa ra man siya tagda, bisan gani og wa siya magsul-ob og crash helmet, mitabok ang tawo ug giduol ang mga LTO agents.

Makita sa video nga gitulisok sa tawo ang mga LTO agents. Human niya’g pangasaba, mitabok siya balik sa karsada ug didto na nga gisunod siya sa mga LTO agents.

Nakita sa mga LTO agents nga may nagbugol sa iyang likud, paghikap sa usa ka agents, nahibaw-an nga nagdala diay ang tawo og kutsilyo. Didto na nga nahitabo ang kaguliyang kay gidakop na man siya sa LTO agents.

Karong panahona, gidili ang pagdala og mga armas, apil na ang mga mahait nga hinagiban sama sa kutsilyo. Nangangkon man ang maong tawo nga usa siya ka “farmer.”

Kon ma-justify niya nga ang kutsilyo kagamitan niya sa pagpanguma, dili kini maayong iluklok sa hawak. Ang tukma nga paagi iya kining putoson unya, isulod sa U-box, dili kay iluklok sa hawak.

* * *

Daghan ang midapig sa maong tawo, ilabi na kadtong taga Bohol, kay giabusohan lagi kuno ang 59-anyos nga driver sa motor, nga igsuon og kanhi mayor. Gipaimbestigar na ang maong hitabo, ug magpaabot ta sa resulta.

Ngano kuno nga nangabot man ang mga LTO agents nga taga Cebu didto sa Bohol? Ang tubag niini mao nga sakop sa regional operations division ang maong mga LTO, ug gipadala sila didto aron dakpon ang mga wa motuman sa balaod.

Dili makaya sa LTO-Bohol ang pagpanakop sa daghang “violators” nga nagpadagan sa ilang mga sakyanan, sagad mga motor nga expired na ang rehistro, ug daghan ang way mga driver’s license.

Kon expire ang rehistro, expire sab ang insurance. Kon makaaksidente ang motor, kinsa man ang moabaga sa pagbayad? Ang sagad rason nga wa ma-renew ang rehistro kay way kwarta ang tag-iya, sa ato pa kon makaaksidente, samot na nga dili sila makagasto pagpatambal sa ilang madam-agan?