Sungog sa sunog

Gisubhan dayon og sunodsunod nga sunog ang pagbukas sa Fire Prevention Month diin unang nahitabo sa unang adlaw didto sa  Sitio Yellow Bell, Barangay Looc, Lapulapu City nga nakaugdaw og 11 ka pinuy-anan ug adunay pito nga partially damaged diin 22 ka pamilya ang apektado sa sunog.

Wala magpauwahi ang dakbayan sa Sugbo, pasado ala una sa kaadlawon miulbo ang dakong sunog sa sitio Naba Barangay Mambaling nga nilamoy sa 105 ka balay ug nakaapekto sa 195 ka pamilya base sa record sa City Social Welfare Office. Dali nga giugdaw sa sunog ang mga balay kay ginama ra kini sa mga light materials.

Tungod kay kaadlawon nahitabo ang sunog, wala na makapamunit sa ilang mga kabtangan ang mga tawo kay giseguro nila ang pagsalbar sa ilang kinabuhi kay matud nila makita ra ang mga butang bahala na og maabo kini basta luwas lang silang tanan. Usa ang natala nga naangol sa maong insidente.

Pipila ka oras human sa sunog sa Mambaling nasunog usab ang bunkhouse sa SRP ug dayon ang pagtumaw sa sunog sa kakugnan o kasagbotan sa sitio Sta. Anna sa Barangay Labangon diin halapad nga kasagbotan ang gilamoy sa kalayo nga naghatag og peligro sa mga tawo nga namuyo sa dapit sanglit dali raman kaayo lamyon sa kalayo ang mga cogon didtong dapita. Maayo nalang kay napawong ra usab sa mga bombero ang grassfire.

Nganong sungog sungogon man sa sunog kining buwan sa Marso? Sa kinaraan nga tubag nga tungod kay kining buwana nagsugod na usab ang pagkasinati nato og ting-init nga angayan nga matngonan sa tanan aron malikay sa sunog kay hilabihan gyud ka lisod ang mga tawong mag antos sa epekto sa katalagman nga maagian.

Bisan unsa nalang nga programa ang gihimo sa Bureau of Fire Protection aron pahinumduman ang mga tawo sa angayan ug dili angayan nga buhaton aron malikay sa sunog, apan ang tanan palapos lang sa dunggan ug ang resulta disgrasya. Ang pagpalingoglingog sa mga pahimangno magbunga usab og dili maayo.

Ang ubang mga tawo nag amping gyud aron dili mahitabo ang gikahadlokan apan ang uban wala may pakialam nga kadanghag lang ang nawong ug makaamong sa uban. Ang angyan nga buhaton gyud ang pagpakig alayon sa usag usa aron mapanalipdan ang tibook komunidad.

Community effort man kini kay simbako og dunay sunog dili ra man ang balay sa nagdanghag ang masunog kon dili apil ang mga pinoy-anan sa uban nga nagtinarong. Busa kon dunay mamatikdan nga dunay naghimo og katingalahan diha nga posibleng mosangpot sa sunog magpakabana gyud dayon pag-report sa mga otoridad aron masanta.

Lakip niini ang illegal nga pagtap sa kuryente, ang uban kadagkot og kuan alang sa ilang bisyo sama sa segarilyo nga magpataka lang og labay sa opos nga daling makahaling og sunog.

Unta matisok sa alimpatakan sa tanan nga responsibilidad nato ang matag usa busa ato kining panalipdan pinaagi sa pagbantay nga dili kita mabiktima sa ingon niini nga pagsulay. Amping lang gyud kanunay.