Human na'ng papating

Nalamdagan ra sa katapusan si kanhi mayor Michael Rama ug giuli ang sakyanan sa syudad nga nasilbi niyang service kaniadto.

Human sa pila ka buwan nga pagpapating, nahigmata si Rama niadtong Biyernes sa buntag ug nakapalandong nga sayop ang iyang gibuhat.

Iyang giangkon atol sa press conference niadtong Biyernes nga human sa iyang reflection sa gospel iyang nahunahuna nga iuli ang sakyanan tungod ug alang sa katawhan sa syudad.

Iyang gihimo ang pag-uli sa iyang service vehicle---usa ka bulletproof Super Grandia---usa ka adlaw human siya mihatag og kondisyon sa syudad nga iuli lang niya ang sakyanan kun makapakita ang City Hall og dokumento pagprobar nga naserve na ang iyang dismissal order.

Bisan wala matuman ang iyang kondisyon, nahukman ni Rama nga ibalik ang sakyanan pinaagi kang Vice Mayor Dondon Hontiveros.

Ang tinuod wa nay laing kapilian si Rama gawas sa pagpili sa husto ug angayan niyang buhaton--iuli ang sakyanan.

Kini tungod kay nagkahilis ang panahon alang niya human sa mga demand letter sa City Hall ug sa pagpablotter sa mga opisyal sa kagamhanan didto sa Highway Patrol Group.

Kun padayong nagmagahi si Rama, dili gyud kapugngan ang posibling kasong kriminal nga iyang atubangon.

Isip usa ka abogado, nasayod si Rama niini. Busa sa dili pa mahitabo ang pagpasaka og kasong carnapping batok niya, iyang gipugngan pinaagi sa pag-uli uban ang bulatik nga tungod sa katawhan.

Dili tungod sa katawhan ang iyang pag-uli sa sakyanan kun dili aron pagsalbar sa iyang kaugalingon sa tino nga kasong kriminal nga iyang atubangon.

Wala sab makatabang sa iyang kandidatura ang iyang papating tungod kay mas daghan ang wala makauyon sa iyang gihimo.