Kamadanihon sa Siquijor

Sa unang higayon nakataak ko sa lalawigan sa Siquijor. Daghang salamat sa talagsaong kahigayonan, Department of Education (DepEd)-7, ug sa pagsalig isip usa sa mga hurado sa tinuig nga Regional Schools Press Conference (RSPC).

Ang Siquijor maoy host karong tuiga sa kompetisyon sa mga campus journalist gikan sa nagkalain-laing tunghaan sa Central Visayas.  Ug sama sa nanlabay’ng tuig, malampuson ang kalihukan ug sigurado ko nga nagbilin og espisyal nga kasinatian ug handumanan sa tanang mga tinun-an nga nisalmot.

Karong hapon, Huwebes, Pebrero 27, gitakdang ipahigayon ang awarding sa tanang mga mananaog sa nagkadaiyang categorya sa sangka. Sa tanang mga nidaog hinaot magsilbi ning inspirasyon alang kaninyo nga mopili og career sa media sa umaabot. Akong panghinaot sab nga dugangan pa ninyo ang pagpaningkamot aron mamahimong takos nga morepresentar sa inyong mga tunghaan ug sa tibuok rehiyon alang sa National Schools Press Conference (NSPC) pipila ka buwan gikan karon.

Sa tanang delegado, lakip na sa wala swerteha, kanunay’ng hinumdumi nga kamo pulos mga mananaog sanglit kamo maoy napili nga morepresentar sa inyong mga tunghaan alang sa rehiyonal nga kumpitisyon. Pahalipay usab sa tanang mga magtutudlo nga nagsilbing coach sa ilang mga tinun-an ug sa tanang kadagkuan sa DepEd sa paghatag og importansiya sa campus journalism.

Pinaagi sa mga batan-ong campus journalist siguradong magpabiling buhi ang propesyon sa media nga sa kasamtangan nag-atubang og dakong hagit nunot sa pagsulbong sa social media nga gihugpaan sa mga lampingasan ug iresponsable nga tigpakatap sa mini nga impormasyon.

* * *

Bisan dalikyat ra ang akong pagtaak sa Siquijor, ug bisan wala gyud nako masinati ang nindot nga talan-awon sa maong lalawigan tungod sa kahagip-ot sa panahon.

Apan sigurado ko nga ang probinsiya madanihon dili lang tungod sa natural niini nga kaanyag ug ka adunahan sa iyang kultura, apan tungod sab sa buotan niini nga mga molupyo.  Ang kamalinawon sa maong probinsiya usa sab sa nagdugang sa iyang kamadanihon.

Kamatuoran sa kamadanihon sa probinsiya mao ang pagdagsa sa mga langyaw nga turista. Gikan sa pagsakay nimo sa fast craft paingon sa Siquijor hangtod sa pagdunggo sa pantalan labihan ka daghan sa mga langyaw nga turista.

Gani sa akong tan-aw mas daghan pa ang mga pasaherong langyaw kaysa mga Pilipino sulod sa fast craft atol sa akong pagbiyahe paingon sa maong probinsiya.