Nagkalami ang kampanya

Kaniadtong miaging semana, ang kamot ni Yogi Ruiz giisa sa dakong opisyal sa Partido Federal nga maoy ilang standard bearer pagka mayor dinhi sa dakbayan sa Sugbo sa umaabot nga election.

Ang Partido Federal maoy partido nga ni Presidente Bongbong Marcos sa pagdagan niya pagka presidente, pero si Yogi migamit sa Kilusang Bagong Lipunan (KBL) pag-file niya sa iyang Certificate of Candidacy.

Ang KBL maoy partido ni kanhi Presidente Marcos nga amahan ni Bongbong dihang diha pa kini sa katungdanan. Apan ang pangutana, sigurado ba ang kadaogan ni Yogi abi kay gituboy siya sa Federal Party.

Ang akong tubag, sa pangutana dili. Bisan og ang kamot ni Yogi gituboy pa ni Reynaldo Tamayo Jr., nga maoy national president sa Federal Party, wa ni epekto.

Kami gani sa media wa makaila nianang Tamayo, ug labaw na sa mga ordinaryong botante. Unsaon, kuwang pagpasabot ang mga botante kabahin sa ilang tinguha nga mobanos sa katungdanan.

Dinhi sa Cebu City, dili mabasta-basta ang kaatbang ni Yogi nga sila si Incumbent Mayor Raymond Garcia, City Councilor Nestor Archival ug si kanhi mayor Michael Rama.

Dili magsilbi ang propaganda ni Yogi diha sa mga billboards, ug magkinahanglan gyuid unta nga pasabton ang mga botante sa iyang tinguha pinaagi sa mass media, apan wa niya kini himoa.

Tan-aw nako, nakabentaha gyud pag-ayo si Mayor Raymond Alvin Garcia sa pagka karon kay siya man ang naglingkod nga mayor. Kaniadto, ang pagpanghatag sa mga cash assistance sa senior citizens adto gyud sa katapusang semana sa ikatulong buwan.

Apan karon, sa unang semana pa lang sa ikatulong buwan, ihatag na ang quarterly cash assistance sa mga senior citizens. Niana nga paagi ang mga seniors sigurado nga makabig ni Garcia nga maoy ilang kandidato.

Sa akong programa sa radyo sa DYLA sugod alas 7:30 sa gabii, anha nako hisgotan ang maong isyu.                                   * * *

Holiday kagahapon, ug dugay ko nga naka-submit sa akong lindog ug lain pa nga artikulo sa Banat News. Nakalimot na lang ko kay nagkanta-kanta mi ug ang akong amigo.

Duna ko’y napalit nga bag-kampanya sa ong blutooth karaoke nga kusog ug dili gyud mo-feedback ang microphone, apan wa koy gana mokanta nga ako ra. Pero kagahapon, nalingaw ko kay uban nako ang akong suod nga barkada.

Bisan og pagaw ko, apan dunay ilimnon nga makapawala sa pagaw. Mangutana mo’g unsa? Kontaka ko kay sultihan nako mo og unsa. Usbon nako, nagkalami karon ang dagan sa kampanya dinhi sa ato.