Cokaliong dalay'gon

Pagka dalay’gon sa pamilyang Cokaliong kay migasto sila og minilyon ka pesos sa pagpanindot sa gym sa Tejero Elementary School sa Dakbayan sa Sugbo isip kabahin sa ilang Corporate Social Responsibility.

Gikalipay pag-ayo ni Cebu City Mayor Raymond Alvin Garcia nga ang Edgar Cokaliong Foundation Inc. wa maanugon paggasto sa ilang kwarta aron maalagaran ang mga lumolupyo sa Tejero ug silingang mga barangay.

Mitambong sa ceremonial turn-over ceremony kaniadtong Huwebes si Chester Cokaliong, ang Chief Executive Officer sa Cokaliong Shipping Lines, ug mipasalig nga duna pa sila’y laing mga proyekto.

Sus, dalia ra gyud. Kaniadtong Septiyembre 2024 lang nagpirmahay og Memorandum of Agreement (MOA) sila si Cokaliong ug si Mayor Garcia ug ang kadagkoan sa tunghaan, pero karon human na ang proyekto.

Matud ni Mayor Garcia nga unta, ang pagka matinabangon sa mga Cokaliong, ilabi na ni Chester, manakod unta sa ubang mga magpapatigayon aron mas daghan ang matabangan.

Duna pa gani diay sila’y mga tinun-an nga anak og kabus nga ginikanan apan lantip og salabotan nga gihatagan nila og scholarship aron nga makalampos sa pagtungha.

Gisuwat ko kini aron pagdasig sa uban nga mohimo usab og corporate social responsibility.

* * *

Karong Lunes, “Holiday” dinhi sa Dakbayan sa Sugbo kay ika-88 ka tuig kini nga sumad sa pagkahimong siyudad sa kanhi ordinaryo lang nga lungsod.

Nahimong siyudad ang Cebu kaniadtong 1937, pinaagi sa balaod nga gipangamahanan ni kanhi Senador Vicente Rama. Ang nahimutangan sa Cebu City Hall karon, mao ra usab ang nahimutangan sa munisipyo sa Cebu kaniadto.

 Dili sama sa Provincial Capitol nga kaniadto diha man magbase sa M.J. Cuenco Avenue atbang sa Plaza Independencia nga gitawag pa kaniadto og Martirez.

Daghang kalihokan ang gihimo atol sa pagsaulog sa siyudad sa Charter Day. Kaniadtong Huwebes, gipahigayon ang pag-award sa mga kawani sa Cebu City government nga giisip nga dako og natabang sa ilang trabaho.

Unya, karong gabii, ipahigayon usab ang Testimonial Dinner nga anha ipahigayon sa Waterfront Hotel ang Casino sa Lahug, ug inigka Lunes nga mao na ang adlaw sa Charter Day, ipahigayon ang usa ka santos nga misa sa atubangan sa City Hall ug inighuman, isunod ang flower offering ngadto sa estatuwa ni Don Vicente Rama.

Kon mangutana mo kon gidapit ba pagtambong sa kalihokan si dismissed Mayor Michael Rama, wa ko masayod. Pero kon ako’y pahukmon, mas maayo gyud nga imbitahon si Mike sa pagtambong sa kalihokan karong adlawa.