Ang ebolusyon sa kampanya

Nganong mokanta ug mosayaw naman ang mga kandidato sa ilang pagpangampanya matag piniliay?

Ang tubag paagi kini sa ilang mga campaign strategists nga kabahin sa ebolusyon sa kampanya.

Sukad pa kaniadto ug hangtod karon maoy nag-unang suliran sa mga partido ug kandidato ang pagtapok sa mga tawo nga motambong ug maminaw sa ipanulti sa mga kandidato.

Kaniadto gikinahanglan ang mga kandidato nga maayo manulti kay makatabang kini sa pagtapok sa mga tawo. Gani ang partido o kandidato magsuhol pa kini og motudlo unsaon sa pagsulti sa kandidato inig pangampanya na.

Sa mga naunang eleksiyon gamit kaayo ang name recall maong kanunay nga makapabor ang mga nailhan nang pangalan kay sa mga bago. Ang mga bag-ong kandidato dili kaayo mailhan sa mga botante kay gamay raman kanila ang motambong sa mga campaign rally kay kapoyan na.

Tungod niini, nakahuna-huna ang mga campaign strategists sa pagkuha og mga entertainer nga molingaw ug makapadugok sa mga tawo aron dunay daghan nga makapaminaw ug makaila sa mga bagong kandidato.

Karon, ang mga kandidato na mismo ang molingaw sa mga tawo nga mitambong sa ilang campaign rally. Gituyo kini sa mga campaign strategist tungod kay ilang naobserbahan nga daling mahinumduman sa mga botante ang mga kandidato nga nakalingaw sa mga botante. Ang tawag ani nga stratehiya DEAN o Delight, Entertain, Amuse ug Noise.

Maong ayaw namo reklamo kun ang mga kandidato mokanta ug mosayaw kay mao man kini ang inyong gusto. Mas ganahan mo nga malingaw kay sa seryosohon sa pagsabot ang ipanulti sa mga kandidato.