Buhata dayon bi

Tan-aw nako way gyuy mahimo ang kadagkoan sa Comelec batok sa mga kandidato nga nagpataka lang sa pagpamutang sa ilang mga campaign materials diha sa wa itugot nga mga lugar.

Bisan pa og nagmugna na kuno og task force ang Comelec nga gilangkoban sa mga kawani sa DENR, DPWH, PNP ug gikan sa ilang opisina aron maoy mohimo og Operation Baklas, kutob ra gihapon ni sa sulti.

Nindot ang awhag ni Cebu City Mayor Raymond Alvin Garcia ngadto sa iyang mga kaalyado nga kandidato nga panangtangon nila ang ilang mga campaign posters nga wa sa tukma nga lugar.

Duna man guy gitawag og “common posters area” nga itudlo ang Comelec nga anha pwedeng ibutang ang mga campaign posters sa mga kandidato, dili kay bisan asa na lang.

Sa miaging mga eleksyon, sagad sa mga common posters area anha sa mga merkado, barangay hall, ug mga public plaza ug dili kay bisan asa na lang ipangbutang.

Ang ubang mga posters’ team sa mga kandidato naa gipapilit ug gilansang sa punoan sa mga kahoy, ang uban anaa sa mga poste sa kuryente, anaa sa mga taytayan aron makita dayon sa mga tawo nga moagi.

Unya, ang Chairman sa Comelec nga si George Garcia miingon pa nga ang mga kandidato dili kuno tugotan nga mogamit og mga plastic nga propaganda materials, apil anmg tarpaulin.

Misamot ko nga nakapahiyom nga nagbasa sa balita. Matud sa chairman sa Comelec nga ang gitugot kuno sa balaod nga himoong propaganda materials sa mga kandidato ang mga papel ra ug panapton.

Pastilan, kadugay na nga panahon nga tarpaulin na ang gipanggamit nga campaign propaganda materials sa mga politiko. Samot na nga dili kini ikapatuman.

Aw, bisan kini lang mga campaign materials sa mga politiko nga pwerteng dagkoa ang ilang aksyonan.

* * *

Kining mga kandidato nga dili pa mga opisyal sa siyudad, dili gyud angay’ng mohimo’g mga diskurso kon dunay mga panagpundok, sama sa pagpanghatag og mga cash assistance sa kagamhanan.

Law-ay kaayo tan-awon nga kining mga kandidatoha nagpahimu’s sa higayon kay nangampanya sila. Para nako, kon opisyal ka sa kagamhanan, pwede ra nga modiskurso ug motambong, apan kon kandidato ka pa lang, pagbaton sab og delicadeza.

Sige lang, ato lang usa sila nga pahinumdoman nga dili maayo ang ilang gihimo. Wa man gani moadto ang mga elected officials, sila na man hinoon nga mga kandidato pa lang.

 May mikontak man gud nako opisyal sa siyudad ug nangutana kinsa ang didto sa distribution sa cash assistance ug midiskurso. Ang mayor wa gyuy problema kon modiskurso kay siya man ang amahan sa siyudad, apan ang kandidato pa lang, ayaw uy.