LTO ug HPG gising!

Matag higayon nga mosuroy ko bisan asa nga lugar sa probinsiya, makakita gyud ko og daghang motorista, sagad mga driver og motorsiklo nga wa mosunod sa gilatid sa balaod.

Misantop sa akong hunahuna nga way kahadlok ang maong mga drayber kay unsaon man, ang mga kawani sa kagamhanan nga gitugyanan sa pagpatuman sa balaod, maayo ra man modawat sa ilang sweldo.

Ang gipasabot nako niini mao ang kadagkoan sa PNP Highway Patrol Group (HPG) ug Land Transportation Office (LTO) nga napakyas sa pagpatrolya sa mga national ug provincial highways.

Kon ila pa kining gihimo, tingali ang mga driver sa probinsiya, sama sa kalungsoran, motuman gyud sa balaod aron nga dili sila madakpan. Apan kay wa man mohimo’g operation ang HPG ug LTO sa probinsya, mao nga daghang driver nga wa motuman sa balaod.

Paingon ko sa lungsod sa Barili kaniadtong Sabado ug nasundan nako ang mga sakyanan nga abusado kaayo ang mga drayber kay mopadagan nga pwerteng hinaya apan anaa sa “inner lane.”

Ikaw nga mo-overtake adto na lang moagi sa tuo, nga dili gyud unta husto. Dunay daghang motorsiklo, apil na gani mga sakyanan nga buak ang mga plate numbers, nga kon makaaksidente ug mosibat, di gyud mailhan.

Pagbalik nako paingon sa siyudad kay gabii na man, nakakita na sab ko og daghang sakyanan nga depektoso ang suga sa likud, nga ang brake light dili mosiga kon mo-brake ang driver.

Ang grabe gyud kay dunay daghang driver nga nagpadagan sa karsada nga wa magpasiga sa headlight sa ilang sakyanan. Usbon ko, kon duna unta’y mga sakop sa HPG ug LTO nga magpatrolya, magmatngon gyud ang mga driver.

Unta, pinaagi niining atong lindog mapukaw ang mga mga opisyal sa kagamhanan nga nagpabaya sa ilang katungdanan.

Ang mga hepe sa kapolisan diha sa kalungsoran, pakuhaon unta ninyo og TOP ang inyong mga polis aron nga magamit nila pag-isyu sa mga driver nga dili motuman sa balaod.

Dinhi sa Cebu City ug mga silingang siyudad, awhagon sab nako ang mga tagdumala sa traffic enforcement units, nga maglusad unta mo og operations batok sa mga driver nga dili motuman sa balaod.

Apan unsaon, inigkagabii na, mangahanaw man sab ang mga traffic enforcers nga daw sa miuban sa pagsawop sa adlaw. Dia pay lain, midaghan na karon ang mga sakyanan nga nagbuga og itom kaayo nga aso.

Wa na ko makakita og mga sakop sa traffic enforcement team nga maghimo og smoke test sa mga truck de karga ug mga PUJ nga magbuga og pwerteng itoma nga aso.