Atong nakita karong Dominggoha ang panagtagbo sa duroha ka mga babaye. Ang usa edaran apan talianak, ang usa batan-on ug mabdos pud.
Managsama silang nakadawat og panalangin sa Dios nga mao ang mamahimong mga inahan. Ang ilang mga anak dunay mga mahinungdanong tahas ug misyon sa kinabuhi.
Ang usa gitawag aron maoy mahimong precursor kun mag-uuna samtang ang ikaduha mao gyud ang gipasiunhan. Siya kadtong Mesiyas.
Ang maong panagtagbo nagdala man og kalipay tali sa mga inahan ug sa mga bata. Kay siya Juan Magbubunyag ang niulpot man sa kalipay sa dihang si Isabel nakadungog sa pangumosta ni Maria.
Ang taliabot nga Pasko sa Pagkatawo sa Ginoo kasinatian man sa panagtagbo tali natong mga tawo ug sa Dios nga nahimong usa kanato.
Bisan pa man kun kining atong tinuig nga pagsaulog paghandum uban ang dakong pagmaya sa tulukibong pagkahimong tawo sa atong
Ginoo unta ang diwa niini atong mapaambit pinaagi sa paghimo sa atong mga kaugalingon ingon nga mga tigdala sa maayong balita ngadto sa uban.
Dulom ang kalibotan karon ug daw haguka ang mga baruganan sa mga namunoan apan bisan pa man ning masulob-ong kahimtang kita maningkamot nga mapaambit ang mensahe sa kalipay sa pasko ngadto sa atong kaigsuonan pinaagi sa pagdasig kanila sa dayag nga paagi nga ang mga kalisdanan ning kalibutan dili man silot ni tunglo gikan sa kahitas-an.