Makalusot man sa makadaghan nga higayon sa pagpanglimbong apan masakpan ra gyud sa kadugayan. Mao kini ang gidangatan sa usa ka magpapatigayon nga gipadlakan sa Bureau of Internal Revenue kon BIR ang kan-anan ug ang bodega niini niadtong nakalabayng Huwebes.
Motulo na ka tuig kuno nga gilipat lipat sa negosyante ang BIR sa paghatag sa buhis niini nga gipagawas nga gamay ra og kita apan sa tinuod lang dako man diay ang income niini.
Sa sitwasyon nga nasayran sa BIR gipagawas sa negosyante nga naay higayon nga nikita og dos milyones ka pesos ang magpapatigayon apan ang abang niini sa warehouse tres milyones ka pesos kada tuig. Apan ni-survive ang negosyo nga ingon ani ang sitwasyon, kong alkanse sila dugay na untang namatay ang negosyo.
Human sa hataas nga pagpaniid sa mga personnel sa BIR, nasuta nga adunay nahitabong under declaration sa income sa negosyo nga niabot sa kapin P20 milyones ang ilang wala mabayri nga buwis sulod sa tulo ka tuig nga maoy gigukod nga makolekta sa BIR.
Tungod sa kalapasan gipadlakan ang bodega ug ang restaurant sa naasoy'ng negosyante hangtud ma-settle ang bayronon.
Hinuon mora'g dunay hangyo ang negosyante nga bayaran ang bisan katunga man lang sa kantidad aron mabuksan ang negosyo nga kakuhaan usab og kwarta pambayad sa ilang tulobagon.
Gihimug-atan ni Nicanor San Juan sa BIR Cebu City North District ang kamahinungdanon sa buhis alang sa pagpatuman sa mga programa sa kagamhanan nga alang ra pud sa katawhan. Busa nanawagan sila nga mohatag sa sakto nga buhis aron dili maproblema kay sa higayon nga magbinuang ug masakpan maproblema gyud og dako.
Mamahimong makalusot ang uban apan dili sa tanan nga panahon. Kay kong unsa ka dako ang imong natigom sa paglansis sa BIR, mas dako og mawagtang kay pilopiloon man ang gaba nga madawat sa mga limbongan.
Walay dautang binuhatan nga dili masakpan busa pag bag-o aron dili maproblema.