Nagkadaiya ang reaction sa mga opisyal sa gobiyerno ug katawhan sa pahayag ni Bise Presidente Sarra Duterte Carpio nga nagkontrata na siya og mopatay nila ni Presidente Bongbong Marcos, asawa niini nga si Liza Araneta Marcos ug House Speaker Martin Romualdez sa higayon nga patyon.
Ang Department of Justice (DOJ) mihulagway sa bise presidente nga mastermind. Ang National Bureau of Investigation nga ubos sa DOJ mi-subpoena na sa bise presidente aron tubagon ug paisplikahon sa gipagawas niining pahayag.
Ang Presidential Security Group mipahugot na sa ilang pagbantay sa unang magtiayon sa nasud.
Giawhag usab ni Senate President Chiz Escudero ang bise presidente sa pagpugong sa pagpagawas og mga pahayag nga makadaut.
Kining tanan atong mahulagway nga over acting lamang.
Bisan gisulti sa bise presidente nga wala siya magkomedya pero dili pod siya seryoso. Kun seryoso pa si VP Sarah dili unta siya mosulti sa tibuok Pilipinas ug kalibotan nga iyang ipapatay ang tulo ka mga personalidad. Dili unta siya motug-an aron dili mahibawan sa iyang plano.
Gawas niini, unsaon man pagseguro niya ug sa iyang gikontrata nga motuman sila sa ilang sabot? Kun ugaling nagkasabot sila pila man ang kontrata? Unsa man ang paagi sa pagbayad? Advance payment ba o full payment?
Ang gikontrata nga mopatay dili g'yud ni mosugot nga unhan lang kay dili na siya makaseguro nga mabayran kay ang mobayad patay na. Hinumduman nato nga ang pagpatay himoon lamang human mapatay si VP Sarah. Dili pud mobayad in advance si VP Sarah kay dili pod siya makaseguro nga tumanon sa iyang gikontrata ang ilang gikasabotan kay patay na god siya.
Kun ugaling adunay usa kanila ang dili motuman sa kontrata, walay makadagan kanila sa hukmanan kay ang kontrata nga ilang gisudlan illegal. Maong dili seryoso sa pahayag niini si VP Sarah ug nag over acting lang ang mga tila sa tulo ka personalidad.