Luwas pa ba ang atong katilingban gikan sa kamot sa mga tampalasan nga naglaroylaroy ug nangita og higayon nga makapamiktima? Kini ang pangutana sa uban nunot usab sa mga nahitabo karon nga adunay mga gipamatay sa walay igong hinungdan ug natripan lang. Sama sa nahitabo sa 22 anyos nga si Neca Denise Lagria taga Yati lungsod sa Lioan.
Kinsay magdahum nga ang iyang kakugi mo-report og sayo sa iyang trabaho mao ba diay ang nahimong sinugdanan sa iyang kamatayon. Nobiyembre 19 alas tres sa kaadlawon nagpahatud siya sa iyang amahan sa eskina sa ilang dapit diin atanganan og mga de pasaherohan nga sakyanan kay lagi ipasayo siya og report sa trabaho sa ilang management sa kan-anan nga iyang gialagaran sa dakbayan sa Mandaue.
Nahibulong naman ang iyang pamilya nga dili naman makontrak sa iyang cellphone ug wala na usab maka-report sa trabaho nga mao unta ang iyang tumong ug tuyo niadtong sayo sa buntag. Nasayran nalang nila nga mao diay kadtong babaye nga napalgan sa lapyahan sa SRP sa dakbayan sa Sugbo ang ilang mahal sa kinabuhi.
Sa paningkamot sa kapolisan sa Mambaling Police Station nahatagan gyud dayon og kasulbaran ang kaso kay natultolan nila ang nahimutangan sa suspek ug nadakpan tungod usab sa tabang sa komunidad ug sa pakig alayon sa ilang mga police counterpart. Unang nakuha nila ang multicab nga gigamit sa krimen nga misangpot sa pagtultol nila sa prime suspect didto na sa lungsod sa San Remegio.
Wala na makalimod ang suspek kay nakuha man gyud gikan niya ang cellphone sa biktima nga duna pa gyud ang hulagway niini. Ang paresan sa sapatos sa biktima ug naa usab ang armas sa suspek.
Atubangan sa mga otoridad apil na kang Mayor Raymond Alvin Garcia gikomprontasi sa pamilya sa biktima ang 35-anyos nga si Godofredo Brufar kinsa miangkon usab sa krimen nga iyang nahimo. Naibog siya sa biktima nga iyang pasahero kinsa nilingkod sa front seat ug posibleng nakatulog kini maong iyang gideretso og dala sa hilit nga dapit sa north reclamation area sa dakbayan sa Mandaue. Didto gisuwayan niya og hilabot, gihagkan ang ngabil apan misukol ang biktima maong gipaak ug naputol ang dila sa suspek.
Tungod sa kasuko sa suspek sa biktima iya kining gituok ug namatay. Gidala niya sa SRP ug didto gilabay ang lawas niini ug dayon sibat. Maayo nalang kay dunay CCTV ang mga agianan sa sakyanan nga nakakuha sa sakyanan nga gigamit niini ug gipalig-on pa sa pamahayag sa mga testigo.
Sa nahitabo sa biktima nga dako pa unta kaayo og pangandoy alang sa iyang pamilya, makapangagot kita sa ngipon sa kalagot batok niining mananapa. Hayop kini ug angayan lang nga silotan sama sa iyang gihimo sa biktima. Naanad na diay kining mangtas kay sulod gawas naman diay kini sa prisohan tungod sa mga krimen nga gihimo niini.
Kong mahimo pa lang gilahos nalang og ibot ang dili niini apil pa ang iyang tilaok aron matagbaw gyud ang pamilya sa pagkab-ot sa hustisyan. Apan lagi duna may balaod maong mao kini ang atong sundon. Kong magbinangis kita wala usay kalainan sa suspek nga hilabihan ka dautan.
Kaniadto safety kaayo ang mga tawo kay ang mga kriminal nanago naman kay pamatyon ambot kinsa ang nagpatay. Apan karon nabanhaw naman sila nga walay kukahadlok nga mohunos sa kinabuhi sa ilang isig ka tawo.
Samtang angayan nato daygon ang kapolisan sa dakbayan sa Sugbo ilabi ang mga sakop sa Mambaling Police Station kay nagmalamposon sila sa pagsolbad sa kaso sa labing daling panahon pinaagi sa abag sa katawhan.