Sa unang higayon nasinati sa Pilipinas ang unom ka sunodsunod nga pag-igo sa bagyo sa nasud sulod lang sa hamubo nga panahon.
Wala pa gani makagawas ang usa naa say naglinya nga mosunod gikan sa bagyong Kristine, Leon, Marce, Nikka, Opel ug Pepito.
Dili ra ba ordinaryong mga bagyo kon dili mga super typhoon pa gyud nga mikuso kuso sa mga dapit didto sa Luzon diin nakamugna og grabeng kadaut sa kinabuhi sa mga tawo.
Dili nako ma-imagine ang gibati sa mga naapektohan nga nangatumba ug nahapla na giyatakyatakan pa sa kinaiyahan.
Grabe naman gani kaayo to ang kalisdanan nga gimugna sa bagyong Yolanda sa tuig 2013 ug sa bagyong Odette sa tuig 2021 nga kausa ra kita nakasinati og sama sa ingon niadto ka kusog nga katalagman unsa nalang kaha kining mga naglinya nga mga bagyo didto sa Luzon ug pipila ka dapit sa Kabisay-an?
Lahi na gyud ang panahon karon, mapanglantawan naman daan sa weather agency karon nga kapangandaman sa mga tawo, apan duna gyud gihapoy dili mopatuo nga gikinahanglan pa nga pugson aron mohikling sa mas luwas nga dapit.
Bisan ang gobiyerno seguro wala makasagang sa gipakitang kabangis sa unom ka bagyo nga mikusokuso sa nasud, unsa man ang ilang gihimo, pagpang apod apod sa pagkaon ug ubang dinalian nga tabang? Basin kutob lang pud atubangan sa media kay sa tinuod lang nag-ilaid gyud sa kalisod ang mga apektado nga wala na masayod unsa ang ilang himoon aron makabangon.
Mao unta kini ang tan-awon sa mga opisyal sa kagamhanan ilabi na sa Ubos Balay Balauranan ug Senado nga nag-usik lang sa panahon sa ilang personal grandstanding sama sa imbistigasyon sa kanhi Duterte administration nga in aid of legislation pero niliko man sa tumong unta nila, kasagaran mora'g prosecutor mora'g huwes pud nga naghukom na daan sa ilang resource person paita.
Unya duna silay nakuha? Wala. Sa tinud-anay lang, gausik lang sila sa panahon mas maayo pa og gigahin nila ang panahon pagtabang sa mga nabiktima sa katalagman daghan pa sila og matabangan.
Maayo unta og tinuod nga pagpakabana sa nasud ang ilang gihimo pero klaro man kaayo ang ilang motibo, mas delikado pa sila sa bagyo.