Pipila na lang ka adlaw ang paaboton, mosulod na ang unang adlaw sa Disyembre 2024, dayon paingon na sa Pasko.
Makapasubo paminawon nga kon kaniadto, Septiyembre pa lang, may madungog na kitang mga awit sa Pasko nga ipatugtog sa mga AM/FM stations ug kabalayan, apan karon medyo nagakahanaw na.
Hangtod ning pagsulat, Nobiyembre 7, 2024, bisan sa mga subdibisiyon, miminus na ang kadasig sa mga lumolupyo pagpalit og mga ipangdayandayan sa ilang mga bentana ug tugkaran, timaan nga ning pagpamunoan ni Presidente Bongbong Marcos Jr., naapektohan gayod ang tanan sa grabing pagsaka sa korapsiyon, illegal drugs, krimen ug labihang pagtaas sa presyo sa mga palaliton.
Nga maoy nakapagamay sa balor sa ilang kuwarta, kita o sweldo. Hinungdan, mas gihatagan nila'g prayoridad ang budget para sa inadlaw'ng pagkaon, plitehan-balon sa mga nagtunghang anak, ug uban pang panginhanglan sa ilang pamilya. Sa laktod, na-feel sab sa middle-class ang kalisod sa panahon karon. Samot na, sa mga kabos!
Maong ang bulan sa Disyembre naghatag gyod kanilang mga kabos og kalipay kay makasuroy man sila sa kabalayan ug makapamarayeg pinaagi sa pagpanaygon.
Pipila kanila, kinsa taga probinsiya maningkamot gayod nga makaanhi sa siyudad aron makapanaygon.
Apan makaguol. Kay kinahanglang mangayo pa man sila sa city hall og permiso aron makapanaygon. Dili ba kini nakahatag og kahasol kanila ug nakaguba sa naandang diwa panahon sa mga adlaw nga atong gisaulog ang tinuorayng kahulogan sa malipayong Pasko?
Hinuon, hisabtan man nato nga ang ‘No Permit-No Carolling ordinance’ naumol tungod niining mga badlungong bata nga manaygon sulod sa mga diyep de pasaheroan ug sa manghunong sakyanan sa kadalanan.
Pero dili ba aduna na kitay balaod nga nagdili niini. Tingale, kini igo na. Wala na knahanglana ang No Permit-No Carolling policy. Basta, dili lang diha sa karsada, o sulod sa mga diyep ang manaygon.
Ang bulan sa Disyembre bulan sa paghinatagay-pagsinabtanay-pagkaluy-anay ug ang pagbuhat og mga butang nga ikalipay sa mga kabos tang kaigsuonan. Busa maot kon hasta ilang pagpanaygon ato pang lisodlisoron.
Dili gyod kini ikahimuot sa atong Ginoo, kinsa pinaagi sa mga awit ni Jose Marie Chan ug Michael Jackson mipadala sa Iyang mensahe: “Give love on Christmas Day’.