Katilingbano'ng katalagman

Misaad si Presidente Marcos, Jr. nga pausbawon pa ang paningkamot kabahin sa disaster risk reduction (DRR) sa lokal ug nasyonal nga level human mosaliring ang nasud sa dagkong baha ug lunop gumikan sa nagsunod-sunod nga bagyo nga miagi sa nasud nga nakahimo usab og binilyon nga kantidad sa kadaut.  Ginaingon nga ang pagpanamastamas sa tawo sa kinaiyahan usa sa dakong hinungdan sa atong nasinati nga mga katalagman.  Tawo ra ang hinungdan ug tawo ra usab ang sulbad niini.  Husto ang panahom nga, “Usahay kinahanglan nga adunay kinaiyanhong katalagman (natural disaster) aron mapadaylang usab nga adunay katilingbanon’g katalagman (social disaster).”  Fezteleern!

Pakaslan kay gipamabdosan

Namahayag ang SBD Builders, ang kontraktor nga gitahasan sa pag-renovate sa CCSC rubberized track oval nga mogasto kini sa kaugalingon niini nga kwarta nga balor og P3.8 milyones alang sa pag-ayo sa naguba nga track oval. Alangan kon kinsay mogasto nga wala pa man mahuman ang tibuok kontrata busa responsibilidad pa sa kontraktor ang pag-repair niini. Hinuon, subo man palandungon nga wala pa mahuman ang pagrepair sa track oval, apan mas subo pa gyud tingale  kon wala kini masugdi.  Mao kana’y giingon sa mga katigulangan nga, “Imo man’g gipamabdosan, imo gyud na’ng pakaslan.”  Madahaan!

Mahurot og kalampurnas

Nanawagan si Bise Presidente Sara Duterte sa katawhang Pilipino nga mag-ampo alang sa kalinaw ug kalig-on sa nasud taliwala sa mga “hagit sa panuway, inhustisya ug sa mga personal nga interest sa uban.” Mora’g dili na panumbalingon sa katawhan ang maong panawagan.  Mas palabihon pa tingale sa katawhan ang mag-ampo nga mokunhod na unta ang presyo sa palaliton.  Matud pa sa akong amigo, “Kon dunggon uroy sa Kahitas-an ang mga pag-ampo, basin baya mahurot og kalampurnas ang mga panuway nga anaa ra mismo sa kagamhanan kinsa maoy mipatigbabaw sa ilang personal nga interest ug naghimo’g inhustisya sa katawhan.”  Muleeng!

Nakigbugno sa baboy

Giawhag nila ni Kongresman Dan Fernandez ug Bienvenido Abante si kanhi Presidente Rodrigo Duterte nga likayan niini ang pag-gamit og mga binastos nga pulong atol sa mga pormal nga legislative hearing.  Alang kanila dili haum ug makahahadlok hunahunaon ang usa ka kanhi president nga magbinastos atol sa maong mga pagdungog.  Nasayod na ang tibuok nasud kabahin sa matang sa sinultihan sa kanhi presidente busa dili na ikatingala.  Makaingon lang hinoon kita nga nalupig ang nagpatawag sa hearing sa sinukliay sa rason. Mao kanay giingon nga, “Kon makigbugno ka sa baboy, magkabulingit ka gayod apan labing malipayon ang baboy.”  Pagkatoytoy!

Gi-luiban sa pinulongan

Human sa mokabat duha ka tuig nga pagtago-tago didto sa Indonesia, nadakpan ra gyud sa mga awtoridad ang usa ka mangingilad nga Thai YouTuber human kini mabuking nga dili diay siya usa ka lumad nga Indonesian tungod kay napakyas kini pagkanta sa nasudnong awit sa maong nasud atubangan sa mga awtoridad.  Wala diay magkadimao ang mangingilad nga Thailander pagkanta sa “Bayang Magiliw” sa Indonesia maong sakspan hinoon.  Mao kana’y giingon sa panultihon nga, “Ang isda madakpan gayud sa iyang baba.”  Saoonz!