Walay limit ang pagkab-ot og edukasyon ug wala usay gipili kon si kinsa ang makaangkon niini basta interesado ang mga bata ug ang mga ginikanan ug dunay mga mabuot nga mga tawo nga magpakabana ang tanan posible gyud.
Sama nalang sa gihimo sa Action for Nurturing Children and Environment kon ANCE, usa ka non-government organization nga gihatagan og accreditation sa DSWD ug sa local government unit nga maghimo og daycare center alang sa mga bata nga kabus.
Apan ang nakalahi niini sa uban kay ang ilang eskwelahan naa nahimutang sa sulod sa sementeryo, ang ilang lawas mao ang dakong mosoleo nga iya sa usa usa ka prominenting pamilya.
Mokabat na sa 13 ka tuig nga nag-operate ang daycare center sa menteryo ug daghan na silang natabangan nga mga batang kabus ilabi na kadtong mga bata kansang pamilya nagpuyo mismo sa mga nitso sulod sa Chinese cemetery sa Barangay Carreta sa dakbayan sa Sugbo. Ug naka-produce na sila og mga bata nga malantip ang salabotan nga mopatigbabaw gyud sa higayon nga mabalhin na sila sa elementarya sa ubang eskwelahan.
Libre ang tanan, gikan sa uniporme, school supplies ug duna pay feeding sa mga tinun-an ka duha sa usa ka semana nga dako na kaayo og gikatampo sa paglambo sa panglawas ug pangutok sa mga bata.
Ang naasoy’ng NGO gisuportahan usab sa mga nagpakabanang tawo ug institusyon nga nakabase sa Germany nga naghatag og pundo alang sa sustainability sa ilang adbokasiya nga nakatutok sa pag-umol sa values sa mga tawo aron sa ingon madala nila kini ini’g ka dako nga mamahimong responsableng tawo sa katilingban.
Anaa man sa dapit sa mga patay ang ilang eskwelahan apan mao kini ang nagsugnod sa paningkamot sa mga bata nga mabuhi ang ilang damgo ug pangandoy sa kinabuhi nga mahatagan og katumanan tungod sa tabang sa ubang mga tawo nga nagpakabana nila.
Apan namilegro na ang ilang daycare center karon sa sulod sa sementeryo kay gipapahawaan na kini sa mga nag okupar nga mga tawo kay himoon kining kabahin sa heritage site sa dakbayan. Gani kutob nalang sila karong tuiga.
Apan wala sila mawad-i og paglaum nga mahatagan sila og kahigayonan nga magpabilin sa dapit o kong dili man matabangan sila nga makabalhin og luna nga kapadayonan sa mga bata nga naninguha nga makaangkon og kaalam.
Kong natugotan sila kaniadto, posibleng mahatagan usab sila og kahigayonan karon ug matabangan pa sa atong mga namoan sa kagamhanan kay dakong insulto kini nga ilang balewalaon nga ang ubang nasud ang nagsuporta sa adbokasiya. Mas maayo nga mangunay kagamhanan sa pagpalambo niining maong programa nga alang sa kaugmaon sa mga batang kabus nga nagkinahanglan kanila.