Psycho ug drug test

Giawhag ni Zambales First District Congressman Jay Khonghun si Bise Presidente Sarah Duterte nga mopaubos sa psychological assessment tungod sa gipanulti sa bise presidente atol sa gipatawag niyang tigum sa mga tigbalita.

Gisulti sa bise presidente nga nakahuna-huna siya sa pagputol sa liog ni Presidente Bongbong Marcos ug gipadad-an pod niya og mensahe si Senador Imee Marcos ug gisultihan nga kun dili mohunong sa paglutos kaniya ang administrasyon sa Presidente, iyang ipakawot sa lubnganan niini si kanhi Presidente Ferdinand Edralin Marcos ug ilabay sa West Philippine Sea.

Ang awhag ni Khonghun giuyonan usab sa iyang mga kaubang kongresista ug ubang mga kaalyado sa administrasyong Marcos.

Gisanong ni Bise Presidente Sarah Duterte ang awhag sa mga kongresista. Gani iya pang isumitir ang kaugalingon sa drug test apan ang pagsanong may kondisyon. Gusto usab sa bise presidente nga magpaubos sa psychological ug drug test ang mga kongresista, ilabi na kadtong mga mokandidato sa umaabot nga Mayo 12 nga bugnong lugaynon.

Miuyon usab ang mga kongresista sa hagit sa bise presidente apan kinahanglan usab nga motambong kini sa pagdungog sa gahin sa iyang opisina.

Walay psychological ug drug test niini nga mahitabo tungod sa mga kondisyones.

Klaro kaayo nga dili mosumitir sa ilang kaugalingon ang mga kongresista sa duha ka test tungod kay dili mouyon sa ilang kondisyon ang bise presidente. Wala nay pulos ang pagtambong ni VP Sarah sa pagdungog sa gahin sa iyang opisina tungod kay giaprobahan na sa mga kongresista ang paglaslas sa gahin sa bise presidente.

Mas maayo nga mopaubos silang tanan sa psychological ug drug test aron atong mahibaw-an kinsa nila ang mga kuwang-kuwang ug adik.