Abilidad sa usa ka lider
Bisan subidahon ug piligrong ma-disqualified tungod sa kamanduan sa Ombudsman nga nagtangtang niya sa katungdanan ug nagdili paghupot og bisan unsang pwesto sa gobyerno bisan kanus-a, nipugos gyud pagduso sa iyang kandidatura si dismissed mayor Michael Rama aron magpasubli pagkamayor sa syudad sa Sugbo karong umaabot eleksiyon sunod tuig.
Alang ni Rama dili pa final ang hukom sa Ombudsman ug mahimo pa siyang mokandidato samtang ilang gikwestiyon didto sa Korte Suprema ang kamanduan. Bisan way kasiguroan paboran ba sa labaw’ng hukmanan, girisgo ni Rama ang posibilidad nga mawad-an og lider ang ilang partido kun mapakyas siya pagkuha og paborabli nga desisyon gikan sa Korte Suprema.
Kun di makakuha og temporary restraining order (TRO) si Rama, hayan kanselahon sa Commission on Elections (Comelec) iyang certificate of candidacy ug di na siyang kapadayon sa iyang kandidatura. Kun kini mahitabo mawad-an og ulo ang Barug Bag-ong Sugbo Team Rama.
Ambot nganong labihan ka swapang ni Rama sa pwesto nga di gustong mosakripisyo samtang wala pa mahuman ang iyang legal nga problema. Dili man unta bangkaruti sa maayong lider ang ilang grupo nga mahimong maoy mangulo sa partido samtang nakigbugno pa siya sa iyang kaso.
Ang tinuod daghan og materyal nga angayang mahimong kandidato pagkamayor sa ilang partido ug wa kinahanglana nga iyang ipamugos ang iyang kaugalingon nga magpabilin isip standard bearer bisan sa dako niyang suliran nga giatubang.
Kun diskumpiyado si Rama nga itugyan sa lain ang pagpangulo sa ilang grupo, mahimo man unta niyang ituboy ang iyang pag-umangkon nga si South District Rep. Edu Rama nga mao unay mokandidato pagkamayor.
Gawas ni Edu, naa pud si Vice Mayor Dondon Hontiveros nga labihan ka takos nga mangulo sa ilang partido. Ug di sab mabaliwa ang katakos ni ABC President Franklyn Ong. Ang tulo mahimo untang maoy pilian ni Rama nga mangulo sa ilang grupo samtang wala pa niya masulbad ang iyang legal nga problema.
Ang tinuod nga lider andam mosakripisyo alang sa kinabag-an, apan ang pag-insister ni Rama nga mokandidato bisan kwestiyonable pa ang iyang qualification nagbutang sa seryoso nga question sa iyang abilidad isip usa ka lider.
- Latest