Kataposang siyagit sa kasakit

Kini ang mialingawngaw sa dunggan ug sa kasingkasing sa mga tawo nga nakadungog sa kuha sa CCTV footage sa nahitabong krimen sa sulod sa usa ka poultry farm didto sa Barangay Biasong sa lungsod sa Balamban niadtong Domingo sa buntag. Nagpakiluoy ang biktima nga dili siya patyon apan gihansakan na diay siya og dunggab sa nagkadaiyang parte sa iyang lawas ug wala pa makontento ang suspek mikuha pa kini og barbel nga gibusdak sa ulo sa biktima kinsa niadtong tungora ang iyang tingog literal nga mora’g baboy nga giihaw hangtud nga nawagtang ang iyang tingog dungan sa pagkakutlo sa iyang kinabuhi.

Duna matud pay mga kauban nga nakadungog sa pagpangayo og tabang sa biktima. Apan nagpakabuta-bungol sila kay lagi nahadlok nga sila maapil ug maamong usab ang ilang kinabuhi maong nilampos ang krimen niadtong higayona. Nakasibat ang suspek ngadto sa ilang dapit sa Tabango Leyte, samtang ang biktima kahon nang giuli sa ilang dapit sa lungsod sa Bindoy sa lalawigan sa Negros Oriental.

Nasayran nga ang biktima ug ang suspek daan nang nag-inom sa ilang gitrabahoan nga poultry farm ug dihang nahubog. Nangadto kini sila sa fiesta sa barangay ug didto nagkainitay ug nagkasinumbagay, apan napilde ang suspek. Kini ang hinungdan nga naglungotlungot kini nga mobalos ug dihang nakauli ang biktima ug nipahuway na sa iyang kwarto, gisundan diay sa suspek nga nagdala na og kutsilyo ug didto giluba ang iyang kauban sa trabaho hangtud nabugtoan sa kinabuhi.

Akong nahinabi ang kabanay sa biktima kinsa mitug-an nga 21 anyos pa lang diay kini kinsa milangyaw gikan sa ilang probinsiya aron manarbaho sa Sugbo aron makatabang sa pagbuhi sa ilang pamilya. Napulo sila ka magsoon ug siya ang ikaduha gikan sa kamaguwangan kinsa usa ka babaye.

Puno sa pangandoy ang biktima nga matabangan ang iyang pamilya apan dinhi na diay kutob ang iyang kinabuhi nga gikutlo sa iyang kauban sa trabaho nga nayawaan na niadtong higayona kay lagi ulipon usab sa espirito sa ilimnong makahubog.

Dili makadawat ang iyang pamilya sa gidangatan niini nga magpabilin sa hangtud ang kasakit ilabi na nga literal nilang nadunggan ang kuha sa CCTV nga pagpanglimbasog unta niini nga mabuhi pa. Busa nanghinaut sila nga mahatagan og hustisya ang gidangatan niini ug magmalinawon lang sila kong madakpan ang suspek kinsa gawasnon pa hangtud karon.

Nakig-alayon na ang kapolisan sa lungsod sa Balamban sa ilang counterpart didto sa Tabango, Leyte kay nasigpatan man kuno didto ang suspek. Apan hagit alang kanila tungod kay ni-lapse naman ang hot pursuit operation busa dili na kuno nila madakop ang suspek. Ipasaka nalang nila ang kasong murder hangtud malutsan og warrant of arrest nga maoy basehan sa ilang pagsikop niini.

Unta dili kini mahisama sa ubang mga kaso nga ang mga biktima kabus ug wala nay mo-follow up dili gyud mahatagan og kasulbaran mahulog nalang sa kalimot ang tanan. Kong adunahan ug impluwensyado kining biktima duna nay task force nga giumol alang sa dali nga kasolbaran apan tungod kay pobre man daw mahulog kini sa walay padulngan.

Dako akong paglaum nga tutokan kini sa kapolisan sa Balamban kay seryoso baya sila sa pagsolbad sa krimen, unta mahatagan kini og katumanan.