Kaka

Naghuot ang Parian Police Station human nadakpan sa kapolisan ang 42 ka tawo sa gipahigayon nga pagpangronda sa derby sa Kaka sa may Sitio Lawis, Lorega San Miguel alas 10:30 sa gabii niadtong Septiyembre 23, 2024.

Nakuha sa mga nadakpan ang 32 ka kaka ug salapi nga mikantidad og sobra duha ka libo ka pesos nga posta.

Walay bisan usa nga nakaipsot sa gihimo nga ronda tungod kay usa ra ang sudlanan ug gawasanan sa dapit.

Kaniadto ang magduwa og kaka mga bata lamang pero karon apil na ang mga tiguwang.

Tungod sa pagkaboang sa kaka ang mga dinakpan nakahigda gyod og prisohan. Natagbaw tawon og pangitan nila ang ilang mga asawa tungod sa kabalaka kun hain na apan ila nalang napalgan ilang bana sa prisohan sa Parian.

Dili makabasol ang gobiyerno sa katawhan nganong sila sugarol tungod kay ang gobiyerno man mismo ang nagdasig ug naghimo nilang sugarol.

Gani makita na nato ang bisan unsang matang sa sugal diha sa mga online. Kun gusto man sa gobiyerno nga hunongon ang sugal kinahanglan nga iyang pahunongon ang tanang matang sa sugal kay kun dili, igo ra siyang nagpakaaron-ingnon ug maingon nato nga ang iyang paggukod sa mga illegal nga sugal iyang gituyo aron makuha ang kakompetensiya sa gipadagan niyang sugal.

Ang sugal legal man kini o illegal sugal gayod ug dili maghatag og kaayohan sa katawhan hinuon makaut-ot kini sa ilang panudlanan.

Kun imo nga tanawon ginagmay lang ang pusta sa kaka pero mao kini ang sinugdanan sa pagsulod sa tawo sa dakong sugal.