EDITORYAL — Pag-ampo ug inyong boto

Nagkadaghan nang mga Pilipino ang hinayhinay nga nakasabot ug nasayod sa mga panghitabo karon diha sa West Philippines ug sa mga dautang gipanghimo sa China sa pagpamugos niini nga angkunon ang mga teritoryong iya sa Pilipinas ubay sa international law.

Makita diha sa mga komento sa mga netizens sa mga balita ug posts sa social media ang ilang kasagmuyo, kaguol ug kasuko sa China. Apan daghan sab nila ang dali kaayong mibasol sa mga matud pa nila “kurap” o kurakot nga mga opisyales sa gobiyerno.

Aduna say mga nagkomento nga daw kuwang gyud sa kahibalo kabahin sa isyu ug walay ideya sa kun unsa ilang gipang-komento. Dunay nagkalain-laing mga klase sa netizens nga kusog mokomento sa mga post nga sama pa niini, apan kasagaran gyud nila mga “keyboard warriors,” mga “desk generals,” kanang gitawag og mga “dapat sana” ug “diehard supporters sa mga politiko” ug labaw sa tanan kanang mga “utak talangka.”

Kining mga tawhana mao ni silang kadtong  mokomento nga gusto dayun girahon ang China, kusog kaayo dayung mokomparar sa mga kagamitan sa Armed Forces of the Philippines ngadto sa mga gamit militar sa ubang nasud, kanang maayo kaayong mangangkong ilahang presidente maoy dako og nabuhat, ug kanang suyaon. Hinuon, dili gyud tanang Pilipino adunay nahibaw-an kabahin sa geopolitics, kasaysayan ug ang kasamtangang dynamics sa WPS ug sa tibuok South China Sea diin kini nahimutang.

Apan nabantayan nga dili lang karon kining mga klaseha ang kusog mokomento karon, duna say gitawag og mga “prayer warriors.” Sila kadtong ang komento pag-ampo para sa grasya ug proteksyon sa Pilipinas gikan sa mga dautan.

Dili hinuon kini sayop, maayo nalang ni sila kun itandi anang mga nahaunang nahisgutan. Apan kaning pag-ampo kung walay aksyon, wala man sab kini padulngan.

Ang kalamboan ug proteksyon sa Pilipinas naa sa mga kamot sa mga botante. Magmatngon gyud unta sa pagpili og mga botarang kandidato karong mid-term elections sa 2025 ug sa umaabot sab nga 2028 national and local elections.

Di botaran ang mga kandidatong adto laban sa ubang nasud ug kadtong mga nagmaskara lang nga maayo kaayong mobulatik, mopasikat , magpaisog-isog ug labaw sa tanan kusog mosaad.