Wa bahini sa kabilin

Dear Atty. Divine,

Naa koy pangutana about sa yuta sa akong lola ug lolo. Dugay nang namatay ang akong mga apuhan ug aduna silay kabilin nga yuta nga titulado. Duha lang ang anak ni lolo ug lola nga naglakip sa akong amahan. Karong bag-o mikontak ang akong papa sa iyang igsuon ug iyang gipangumusta sa kabilin nilang yuta. Gisultian ni papa nga ila nang bahinon ang property kay sud sa pipila ka katuigan, ang iyang igsuon lang ang nagdawat sa income sa maong yuta ug wa gyud niya bahini si papa. Sa dihang, nagsugod na si papa sa pagkuha og mga certified true copies sa titulo sa maong mga yuta, iyang nahibaw-an nga nabalhin na kini tanan sa pangan sa iyang igsuon. Unsay angayng buhaton ni papa aron makuha ang iyang bahin? Daghang salamat. -- Lorna

Dear Lorna,

Basi sa balaod, ang imong papa usa sa mga compulsory heirs sa imong lolo ug lola busa dili kini mamahimong hikawan sa iyang katungod sa pag inherit sa ilang kabilin. Ug tungod kay duha lang sila ka magsuon, dapat unta nga bahinon nila in equal share ang maong mga properties. Apan karon nga nabalhin na ang titulo sa maong mga property sa pangan sa igsuon sa imong papa, mamahimo siyang  makigsabot sa iyang igsuon nga ibalik kaniya ang katunga sa maong property pinaagi sa pag execute og Deed of Donation aron ma process ang pag-transfer sa iyang share sa property ngadto sa pangan sa imong amahan.Mas paspas kini nga paagi og di na moagi pa sa korte. Apan kundili mopirma ang imong iyaan sa Deed of Donation kay wa siyay tinguha nga hatagan og share ang imong amahan, then mamahimong mopasaka og kaso ang imong papa ngadto sa korte batok sa iyang igsuon aron sa pagbawi sa  katunga sa maong kabilin. Thank you ang God bless. -- Atty. Divine

Alang sa inyong pangutana palihug lang sa pag- email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.