Gidalidali og angkon sa Malakanyang nga gipakuratan sa iyang mga higala si Presidente Ferdinand Marcos Jr. og pribadong konsiyerto sa Duran Duran atol sa iyang birthday party niadtong Septiyembre 13, human giingon nga gi-leak sa iyang maguwang nga si Senador Imee Marcos ngadto sa trolls sa mga Duterte ang letrato sa kalihokan, aron dili kapasanginlan nga ilang gitago ang eskandalo.
Pero gihukasan sab ang presidente sa mga pasangil nga nalapas ang mga balaod nga nagsugo niya pagpuyo og yanong kinabuhi ug nagdili pagdawat og gasa nga makaapektar sa iyang trabaho.
* * *
Nga niresulta sa hingpit nga eskandalo: Naatol ang ukyab nga party sa adlaw nga nahutdan og bugas ang 63 ka tripulante sa BRP Teresa Magbanua nga sa niaging tulo ka semana nagkaon na lang og lugaw ug nagsawod og uwan ug tubig sa aircon aron mainom.
Nasamotan pa gyod nga, imbes mangayo og pasaylo, ang presidente nidangop sa iyang naandan nga pagtak-om, kabahin sa maniobra sa pagpahilom sa kontrobersiya, nga wala katabangi kay napugos na sab pag-angkon ang palasyo sa lain unta nga gitago niya nga sip-on ug ubo.
* * *
Nga nakapatumaw sa mas dakong eskandalo. Dili makiha ang presidente kay kublan sa tanang kasong kriminal ug administratiba samtang naa pa sa puwesto. Dili mangahas ang Ombudsman sa pagsusi kinsa ang suod nga mga higala sa presidente nga mahimong ikiha.
Wala say kongresista ni senador nga magtagad sa paglusad og impeachment proceedings kay makabungog ang mayoriya sa administrasyon sa duha ka balay balaoranan. Maong, sama sa nangaging mga pakauwaw, mahimong makalimtan ra sab inig ulbo sa bag-ong bulilyaso.
* * *
Dunay laing dag-anan ang mga magbubuhis. Kon matakdan ang presidente sa delicadeza sa mga lider sa ubang kanasuran nga niangkon og responsibilidad dihang nasakpan ang ilang binuang. Pananglitan, si Singaporean Transport Minister S. Iswaran, nga nasakpang nidawat og libreng mga tiket sa Grand Prix ug musicals ug libreng paggamit og pribadong ayroplano nga balor og P21 milyones ($380,000), ni-resign sa puwesto sayo ning tuiga.
Gibanabanang balor og P56 milyones ang surprisang birthday gift ni Marcos. Taliwala sa pag-hatsing ug ubo, walay timaan nga gikusi sa iyang konsiyensiya. Ug labawng walay kahigayonan nga madutlan sa uwaw.
* * *