Ang makahugaw sa tawo

Septiyembre 1, 2024: Ikakawhaag-Duha nga Dominggo Sulod sa tuig

Mga Pagbasa: Dt. 4;1-2/Sal. 15/San. 1;17-18, 21-22, 27/Mk. 7;1-8, 14-15, 21-23

Maayong Balita

Ania na usab kining pundok sa mga magtutudlo sa balaod nga adunay hagip-ot nga pagsabot sa balaod. Nga kun buot hunahunaon nakapunting lamang sa Ritual Purity Laws.

Gitataw sa atong Ginoo nga ang makahugaw sa tawo dili man ang mosulod kaniya pinaagi sa pagkaon kondili sa matag pulong mogula sa iyang baba sanglit kining mga butanga nagagikan man sa iyang kasingkasing.

Kun unsay anaa sa kasingkasing mao kini ang molugwa sa iyang baba. Kun puno sa kalaw-ayan ang kasingkasing law-ay usab ang ipamulong niini.

Kasinatian

Particular kaayo kita kun unsaon nato paghubad ang balaod diha sa mas konkreto nga paagi. Apan maoy atong hinumdoman ang baload gihimo alang sa tawo ug dili ang tawo alang sa balaod.

Ang atong Ginoo nianhi dili lang alang sa kaugalingong tumong ug tuyo aron mas mapanalipdan ang baruganan. Hinunoa unta dunay kalambigitan ang atong pagpanglinis sa atong palibot ug sa atong mga tanlag.

Lihok

Karong semanaha usisaha ang imong mga pulong gipanulti basin kun dili ka makabantay mamahimong halayo ka na sa balaod nga imong buot sundon kay ang kalimpiyo sa imong panggawas nga bayhon dakong sukwahi sa kahugaw sa imong kasing kasing ingon man tanlag.

Pangamuyo

Tanan: Ginoo linisi ang among kasingkasing ug hunahuna aron pulos panalangin lamang gikan nimo ang among mamantala. Amen.