“Dili ako plastik!” Mao kini ang pintok reaksiyon ni Vice President Sara ‘Inday’ Z. Duterte dihang mipasumbingay si Senador Alan Peter Cayetano sa usa Senate budget hearing, nga dapat sa Senado ipakita sa mga gipang-imbitahang opisyal ang respeto niining talahurong institusyon.
Unsaon, grabe ang tinubagay nila ni Inday ug Senador Risa Hontiveros, kinsa mitumbok-gipit sa mga programa sa OVP sama sa Death-Burial assistance, Medical Assistance, Man-made or Natural Disaster Assistance, Magnegosyo Ta, Day ug lakip na sa Primary School Educational Assistance, diin tungod sa dakong Reading Comprehension problems sa kabataang atua magtungha sa mga suokong lugar, nadasig si Inday paggama og Pambatang Libro nga nag-ulohan: Isang Kaibigan.
Mi-propose rag P10M budget si Inday alang sa maong tumong. Pero gikontra kini ni Risa, kinsa mipadayag tanang programang nahunahunaan ni Inday, pulos na parallel or duplicate. Sanglit anaa nay mga ahensiyang gitugyanan niini.
Si Inday namahayag. Nga isip ikaduhang kinatas-ang pangulo sa Pilipinas, gipili siya sa katawhan aron motrabaho-mosilbe-maningkamot kutob sa unsay mahimo aron matunol ang tukmang tabang ngadto sa tanang nanginahanglan. Kay kon palawman lang ang paghunahuna, dangpanan baya ang OVP sa tanang mangayog ayuda? Apan unsa may iyang ikahatag kon babagan ni Risa ang OVP budget?
Okay ra unta kon tanang ahensiya sa gobiyerno dili korap. Pero, unsaon, may mga magpatabang kabos nga moduol sa hingtungdang ahensiya, dugaydugayon ug itulodtulod. Unya ipasa gihapon ngadto sa OVP. Diin, si Inday naanad baya nga motabang gayod!
Balik ta sa ‘Isang Kaibigan’ nga libro. Makahuloganon ang cover niini. Duroha ka managlahing langgam: kuwago (owl) ug parrot. Dili sila parehog balhibo. Pero nagkahigalaay. Nindot-matulon-anon! Mao kini dayon ang nakita kong mensahe nga gustong ipadayag sa tagsulat nga si Inday. Diin matod pa sa nakabasa na, ang moral lesson niining libroha mao: “A friend in need is a friend in deed.”
Very constructive ang nahisgotang libro. May mga bililhong hiyas kang makat-onan. Apan ang kaanyag niini dili makita sa mga diehard anti-Duterte, kinsa matod pa sa iladong Maharlika Boldiyakera, sagad mga highly paid corrupt vloggers kang kansang misyon: “Praise Marcos-Araneta-Romualdez up! And put all Dutertes down!”
Hahayyy, kanus-a pa kaha matangtang kanang trosong nakatabon sa ilang mata, no?