Dengue

Luyo sa mga kasikas ug kagahob nga mugna sa pagbukal na sa kawa sa politika nunot sa nagkaduol na nga eleksiyon karong Mayo sa sunod tuig, daw sa way mga opisyal nga naghisgot sa seryosong problema sa hulga sa makamatay nga dengue.

Kalbaryo ug puno sa kalisang ang milabay'ng semana nako ug sa akong pamilya tungod sa  sakit nga dengue.

Huwebes dihang nananghid akong asawa nga mobiyahe siya paingon sa isla sa Camotes alang sa laing hugna sa Caravan of Services sa Kapitolyo.

Biyernes sa udto mitawag siya ug mipahibawong gihilantan ug nga diriyot siyang kuyapi samtang didto sa isla sa Pilar alang sa pagpangalagad sa publiko.

Tungod kay nabalaka na sa iyang panglawas nihukom siyang motabok sa Ormoc aron mas dali ang biyahe pauli dinhi sa dakbayan sa Sugbo.

Gikan sa Ormoc nilahos siya sa tambalanan ug nagpaadmit. Nasuta nga ubos na ang iyang platelet timailhan nga posibling nataptan siya og dengue.

Makalilisang ang sunod nga mga adlaw tungod sa pagtibugsok og maayo sa iyang platelet hangtod sa 18 hinungdan nga miyamar ang iyang doctor nga mangita og blood donor.

Apan ang mas dakong hagit alang namo dili ang pagpangita og donor tungod kay nagbaha ang misanong sa among hangyo ug andam modonar.

Ang dakong hagit unsaon nga makapasar ang donor tungod kay labihan ka higpit sa proseso sa blood bank. Sa kapin sa 40 ka nagpa-screen way bisan usa nga nakapasar tungod kay kinahanglan lugtaw ug dagko ang ugat aron mosurvive sa kuti ug taas nga proseso pagdonar og platelet gamit ang proseso nga gitawag og apheresis.

Samtang nagkapuliki mi, oras ang among kontra tungod kay labihan na ka luspad sa akong asawa. Daghang salamat ni Dr. Cantillas ug sa iyang asawa nga maoy nakaluwas sa labihan ka kutas nga trabaho pagpangita og platelet.

Daghan sab kaayong salamat sa staff sa Philipine Red Cross nga maoy midonar sa iyang platelet. Kinasingkasing sab namo nga pasalamat sa tanang mga higala ug kabanay nga nitabang pagpangita'g donors ug ingon man nag-ampo.

Sigurado ko nga sama sab nga kalisang ang gibati sa ubang mga tagtungod og pasyente nga sama namo nangita sab og platelet nga maabuno.

Labihan ka daghan sa mga pasyente sa tambalanan nga gani hapit nalang mobalibad ang hospital kay wa na silay kwarto nga kabutangan.

Ug matud sa mga nurse nga daghan kaayo sila'g pasyente nga nasakit og dengue. Matud sab sa mga tinugyanan sa blood bank nga nagnihit ang supply sa dugo tungod sa kadaghan sa mga nagkasakit og dengue.

Angayang tutukan ang kampanya batok sa dengue labi pa ang pagseguro nga dunay igong supply sa dugo alang sa mga pasyente nga nagkinahanglan.

Importante sab alang sa  tanan nga makanunayon ang pagpanglimpiyo sa palibot aron mapugngan ang pagpangitlog sa mga lamok nga nagdala og dengue.

Tuo lang mo dili lalim ang mataptan sa maong sakit. Bisan pa og duna moy kwarta ikagasto wala ni kapuslanan ug  way supply sa dugo.