Ang shabu ni Lola sa daplin sa karsada

Usa ka gamay’ng tindahan ang adunay special officer ngadto sa iyang mga customer nga mga driver sa PUJ, taxi, ug ubang mga suki nga dili gustong makatugpa ug padayon kunong maglurat ang mga mata. Kini ang shabu nga paborito sa mga bisyoso ang nabungkag sa mga operatiba sa National Bureau of Investigation-Central Visayas Regional Office (CEVRO) niadtong nakalabay’ng semana sa Barangay San Roque.

Kong tan-awon ordinaryong tindahan sa mga noodles, kape, pan ug uban pa nga mga essential needs sa mga tawo nga moagi sa iyang pwesto nga anaa ra sa daplin sa karsada luyo sa barangay gym ug duol ra sa Cebu Cathedral. Apan front lang ang tanan sanglit ang shabu man ang tuyo sa mga adik niyang customer. Naaktohan gyud sa akto sa NBI ang 60-anyos nga babaye sa iyang illegal nga kalihokan kinsa nakuhaan og 24 ka paketi sa gitoohang shabu o nagkantidad og dies ngadto sa kinse mil pesos, matud sa NBI.

Giangkon sa tiguwang ang salaod kay matud niya natintal lang siya sa usa ka higala nga mosulod sa pagpamaligya og shabu aron modako ang iyang kita. Tuod man misaka ang iyang kwarta apan wala magdugay ang iyang kalipay kay nasakpan man siya sa iyang binuang. Matud sa tiguwang, magpasumangil kuno ang iyang mga customer nga mopalit og segariyo o candy apan idungan sa paghatag ang illegal nga drugas.

Sumala niya nga gikan kuno sa jail facility ang supply sa drugas nga iyang gipamaligya apan wala matud pa siya makaila basta ma-remit ra niya ang iyang halin. Sangko sa langit ang iyang pagbasol kay kong wala siya nahimong senior citizen wala siya moenter sa pagpabadlong. Nauwaw siya sa iyang kinse nga mga anak ug 20 ka mga apo sa dautang ehemplo nga iyang gipakita.

Unsa kaha ka dako na karon ang suliran sa illegal nga drugas nga mora’g dili naman kaayo hugot ang pagpakigbatok niini sa atong gobiyerno. dili pareha sa una nga magnerbyus ang mga durugista kay gitinuod man gyud sila mao bitawng daghang nangamatay sa war against drugs. Apan karon easy go lucky naman seguro ang mga durugista busa dili ikahibulong nga apil na ang usa ka lola ang namaligya og drugas sa daplin pa gyud sa karsada.

Usa kini ka dakong hagit sa Cebu City LGU ug sa atong kapolisan sa pagpahugot pa sa ilang mga programa batok sa illegal nga kalihokan, ilabina sa illegal drugs nga mora’g dili naman kaayo big deal karon unlike sa una. Hinuon, in fairness sa kapolisan, naglihok baya pud sila pagsulbad niining mga isyuha. Apan gikinahanglan ang hugot nga suporta sa katawhan ug maisog nga lakang sa kagamhanan.