Di sayon, apan di imposible

Ngiob ang palibot dihang migawas ko sa balay niadtong Huwebes sa hapon aron moreport sa trabaho. Samtang nagpaingon sa opisina sa may down town area, inanay nga nangahagbong ang dagkong lusok sa taligsik hangtod nga mibundak ang kusog nga uwan.

Pag-abot nako sa Fuente Osmeña nagsugod na pagbi-aw ang tubig sa karsada hangtod nga akong namatikdan ang pagsuyla na sa tubig gikan sa mga kanal samtang nagpadayon ko sa pagpadayugdog paingon sa The Freeman.

Sa akong pagtangka sa may dalan Colon, lawom na ang tubig hinungdan nga daghan sa mga sakyanan ang nisugod na pagtiurok. Sa akong tan-aw sa mga tawo nga miubog sa baha miabot og saylo sa tuhod ang giladmon sa tubig. Nipadayon ko paingon sa parking lot sa The Freeman nga niadtong tungora gilunopan na sa tubig tungod sa pag-awas sa Estero de Parian. Naabot tinuod ko sa opisina apan dili ko mahimong mokanaog sa sakyanan tungod kay labihan ka lawom sa tubig ug piligro nga moubog tungod sa kahugaw niini nga posibling maghatag og sakit sama sa makamatay nga leptospirosis.

Naghuwat ko’ng mohubas ang tubig usa mokanaog apan naabtan ko og dul-an sa duha ka oras nga natanggong sulod sa sakyanan. Ug sigun sa mga post nga makita sa social media, dili lang down town area ang nakasinati sa maong pagbaha niadtong adlawa.

Dagpan pa sa mga dapit sa dakbayan ang nahiagom usab sa baha niadtong Huwebes ug siguradong dili kadto maoy katapusang higayon nga ato ning masinati dinhi sa dakbayan. Ang baha niadtong Huwebes nagmatuod nga way epekto ang gipasiatab pag-ayo nga Gubat sa Baha sa nasuspensong mayor nga si Michael Rama ug gipadayon karon ni acting Mayor Raymond Garcia.

Pruweba ang nahitabo niadtong Huwebes nga dili igo ang clean-up drive ug demolisyon sa mga istraktura daplin sa kasapaan aron sulbaron ang problema sa baha.

Lapad ug kuti ang proseso nga gikinahanglan alang niini gawas nga labihan ka dako sa kwarta nga kinahanglanon aron padak-an ang atong mga drainage.

Kinahanglan sab ang tininuod nga pagpatuman sa Solid Waste Management Act aron malikayan ang pagbara sa mga agianan sa tubig tungod sa dili husto nga paglabay sa mga basura. Busa nakasabot ko ni Garcia dihang miingon siyang dili siya “Superman” aron masulbad sa usa lang ka pamilok ang problema sa baha. Tinuod nga dili ingon ana kasayon ang pagsulbad niining maong problema, apan dili sab ni imposible kun gamiton lang gyud sa husto ang buhis sa katawhan.