Sa akong pagsulat niini, kamulo nang miandar ang makina sa labing dako, prestihiyoso ug mabulokon nga kompetisyon sa paugnat sa kusog sa kalibutan didto sa Paris sa Pransiya. Ug kini mao ang Olympics 2024.
Sa pagkakaron, liboan ka nag-unang atleta gikan sa upat ka corner sa kalibutan ang atua karon sa Pransiya aron sa pagtigi alang sa gold and glory sa nagkalainlaing disiplina sulod sa pipila ka semana nga kompetisyon.
Ug pipila niini mao ang mga atleta gikan sa Pilipjnas kinsa nagtinguha usab nga makab-ot ang labing taas nga kadungganan sa maong torneyo. Mao nang nanginahanglan sila sa suporta sa tibuok nasud.
Samtang ang dalan padulong sa Olymiada puno sa mga challenges, ang Pilipinas nagpakita og maayong labok sa nakalabay nga katuigan nga maka-compete kini batok sa mga nag-unang nasud sa Asya ug kalibutan.
Sa nakalabay nga Olympiada didto sa Japan, nasungkit sa Pilipinas ang labing una nga gold medal niini pinaagi sa weightlifting. Ug dili lamang gold. Nakakuha usab ang nasud ug duha ka medalyang silver og usa ka bronze.
Mao kadto ang labing maayong performance sa Pilipinas sulod sa usa ka gatos ka tuig niini nga partisipasyon sa Olympiada. Ug manghinaut kita nga mas maayo pa ang performance sa nasud sa Paris Olympics.
Usa sa atong atleta nga atong gilauman nga makahatag nato og dakong garbo mao si Carlos Yulo, ang kasamtangan nga kampiyon sa gymnastics. Ang iyang maayong performance sa nakalabay'ng mga torneyo miisa sa Pilipinas isip usa ka powerhouse karon sa maong klase sa paugnat sa kusog.
Hinuon, wala mag-inusara si Yulo. Adunay lain natong mga atleta nga andam usab nga moisa sa atong bandila. Ug maglaum kita nga silang tanan mopakita og gilas sa ilang paningkamot pagsungkit sa bulawang medalya.
Sa ilang pagtungtong sa entablado sa labing dako nga kompetisyon sa kalibutan, atong ipanghinaut nga molampos ang atong mga atleta pagsungkit sa labing taas nga kadungganan sa Olympiada.