Anaa ang panalangin sa pag-inambitay

Maayong Balita

Dunay batang lalaki nga dunay lima ka pan nga sebada ug duha ka mga isda. Kining maong diyotay nga pagkaon, ang gigamit sa Ginoo aron pagahimoon ang milagro sa pagpadaghan sa pan.

Human sa milagro ang tanan nangabusog ug natagbaw. Salamat sa panalangin gikan sa Ginoo nga nitagbaw sa mga panginahanglan sa katawhan niadtong tungora.

Sa ilang nakita buot nilang himoon siyang ilang politkanhong hari gumikan sa kabusog nga lumalabay nga ilang nasinati.

Kasinatian

Sa atong panaw sa pagtuo, daghan nato ang wala kaayo makakita ni mahimuot sa mga nagkadaiyang mga gasa nga atong nadawat.

Human kita makadawat, nangita pa gyud kita og paagi aron mapun-an kun unsa ang atong nadawat ug nangita pa gyud kita og linain nga katagbawan.

Nahikalimot kita sa tinud-anay nga diwa sa pagpasalamat.

Ang pagpasalamat nagpasabot man usab og pagpaambit sa bisan unsa nga atong nadawat gikan sa Dios. Dili paigo ang pag-ingon:

Salamat Ginoo kondili ato kining ipakita pinaagi sa atong mga buhat sa kalooy ug pagpakabana bisan pa man kun kita nag-antus sa hilabihan.

Dili kini rason aron kita magpakabuta bungol. Makahuloganon kaayo ang tampo bisan pa man kun kini yano ug gamay lamang.

Lihok

Karong semanaha pagpaambit sa imong panalangin ngadto sa mga tawo nga mas nagkinahanglan pa kay kanimo.

Pangamuyo

Ginoo kabus kami apan bisan pa man niini kami mapasalamaton kaayo kanimo. Unta madasig kami pagpaambit sa bisan unsang anaa kanamo sanglit sayud man kami nga anaa sa pagpaambit anaa ang tinud-anay nga kalipay ug ang panalangin nga among gikinahanglan. Ikaw nga buhi ug hari hangtud sa kahangtoran. Amen.